रामेछाप– प्रधानमन्त्री कृषि अधुनिकीकरण परियोजना, परियोजना कार्यान्वयन इकाई रामेछापले जुनार किसालाई जुनारको विरुवा वितरण गरेको छ । परियोजनाले जुनार जोन कार्यक्रम अन्तरगत पचास प्रतिशत अनुदानमा ४ हजार ३ सय पचास ओटा विरुवा किसानलाई वितरण गरेको हो ।
परियोजनाले रामेछाप नगरपालिकाको वडा नम्बर ३ र ९ बाहेकका ७ वटा वडा तथा मन्थली नगरपालिकाको वडा नम्बर ४ र ६ का करिव साँढे तीन सय बढी किसान लाभन्वित हुने गरी विरुवा वितरण गरिएको कार्यालय प्रमुख होमनाथ लम्सालले बताए । उनका अनुसार जुनार जोन कार्यक्रममा सुचिकृत भएका कृषि सहकारी, कृषक समूह र नीजि फार्मले माग गरे अनुसारको विरुवा वितरण गरिएको हो ।
चालु आर्थिक वर्षमा ९ हजार विरुवा वितरण गर्ने कार्यक्रम रहेको तर भनेजति विरुवा उपलब्ध हुन नसकेको कारण तत्काल सबैलाई विरुवा दिन नसकिएको कार्यालय प्रमुख लम्सालले दुखेसो गरे । उनले भने– ‘विरुवाको लागि सिन्धुलीको नर्सरीमा भनेका थ्यौँ, अन्तिममा आएर सम्मझौता गरेअनुसारको सबै विरुवा पाईएन । जसको कारण तत्काल किसानको माग अनुसार विरुवा उपलब्ध गराउन सकिएन । तर पनि विरुवा खोज्ने काम भइरहेको छ ।’
आगामी आर्थिक वर्षमा जिल्लामै विरुवा उत्पादन गर्ने गरी परियोजनाले योजना बनाएको पनि प्रमुख लम्सालले बताए ।
चालु आर्थिक वर्ष देखि सुरु भएको परियोजनाले रामेछापमा जुनार जोन, आलु जोन र बाख्रा जोन कार्यक्रम संचालनमा ल्याएको छ ।
आफ्नो प्रतिकृया दिनुहोस्