रामेछाप- रामेछापको लिखुतामाकोशी गाउँपालिकाले गत सोमबार तामाकोशी नदीमा भएको बस दुर्घटनामा परी ज्यान गुमाएका व्यक्तिका परिवारलाई काजकिरिया र शववाहन खर्च उपलब्ध गराउने भएको छ । शुक्रबार बसेको गाउँ कार्यपालिकाको बैठकले मृतकको जातीय संस्कार अनुसार काजकिरिया गर्न लाग्ने खर्च र शव ओसारपसार गर्दा लागेको खर्च पालिकाले व्यहोर्ने निर्णय गरेको हो ।
सोमबार बिहान मन्थली नगरपालिका वडा नं. ६ स्थित त्रिवेणी नजिकै भएको बस दुर्घटनामा लिखुतामाकोशी गाउँपालिकाका मात्रै ८ जनाको मृत्यु भएको थियो भने दुई जना अझै बेपत्ता छन् ।दुर्घटनामा परी आफ्ना नागरिकले ज्यान गुमाएको र केही अझै बेपत्ता रहेको घटनाले सिङ्गो गाउँपालिका स्तब्ध भएको बताउँदै गाउँपालिका अध्यक्ष केशव महतले मृतक तथा बेपत्ताको सम्मानमा सार्वजनिक बिदा दिने र किरिया खर्च उपलब्ध गराउने निर्णय गरिएको जानकारी दिए ।
बेपत्ता भएका व्यक्तिहरूको हकमा जिल्ला प्रशासन कार्यालयले आधिकारिक रूपमा प्रमाणित गरेपछि मृतकका परिवार सरह नै सहयोग उपलब्ध गराइने अध्यक्ष महतले बताए । पालिकाले दुर्घटनामा ज्यान गुमाएका व्यक्तिका छोराछोरीको शिक्षा र पठनपाठनमा समेत सहयोग गर्ने प्रतिबद्धता व्यक्त गरेको छ । दुर्घटनामा ज्यान गुमाएका नागरिकहरूको सम्मान र शोकमा गाउँपालिकाले फागुन ४ गते गाउँपालिकाभर सार्वजनिक बिदा दिने निर्णय गरेको छ । ठूलो संख्यामा नागरिक गुमाउनु पर्दा सिङ्गो पालिका शोकमा डुबेको उल्लेख गर्दै अध्यक्ष महतले मृतकका परिवारको पीडामा साथ दिन र उनीहरूप्रति श्रद्धासुमन अर्पण गर्न बिदा दिइएको बताए ।
सोमबार विहान काठमाण्डौंबाट रामेछाप हुँदै ओखलढुंगा तर्फ जाँदै गरेको बस दुर्घटना हुँदा लिखुतामाकोशी गाउँपालिकाका ८ सहित १२ जनाको ज्यान गएको थियो भने ८ जना घाइते भएका थिए । दुर्घटनामा परेका अझै तीन यात्रु वेपत्ता छन् ।
