रामेछाप– युथ काँग्रेस नेपालले रामेछाप जिल्लाको जिल्ला संयोजक विवेक घिमिरेलाई मनोनयन गरेको छ । युथ काँग्रेस नेपालको जिल्ला संयोजक चयन उप–समिति तथा संगठन विभागको निर्णयअनुसार घिमिरेलाई बागमती प्रदेशअन्तर्गत रामेछाप जिल्लाको जिल्ला संयोजकका रूपमा मनोनीत गरिएको हो ।
युथ काँग्रेस नेपालका सभापति यजस्वी राईद्वारा हस्ताक्षरित मनोनयन पत्रमार्फत घिमिरेलाई उक्त जिम्मेवारी प्रदान गरिएको हो । पत्रमा घिमिरेको अनुभव, क्षमता र प्रतिबद्धताले संगठनलाई लोकतान्त्रिक, समावेशी र सशक्त बनाउन महत्वपूर्ण योगदान पुग्ने विश्वास व्यक्त गरिएको छ ।
युथ काँग्रेस नेपालले लोकतन्त्र, राष्ट्रियता, युवा सशक्तिकरण तथा सहभागिता, साथै नागरिक, आर्थिक, राजनीतिक, सामाजिक, सांस्कृतिक तथा वैयक्तिक स्वतन्त्रतालाई आफ्नो मूल सिद्धान्तका रूपमा आत्मसात गरेको छ । लोकतान्त्रिक मूल्यमान्यताको संरक्षण र सुदृढीकरण, सुशासनको पहरेदारका रूपमा भूमिका निर्वाह तथा नागरिक अधिकारको प्रत्याभूति गर्नु संगठनका प्रमुख उद्देश्यहरू रहेका छन् ।
संगठनको नीति, विधान र निर्देशनअनुसार जिल्ला तहमा संगठन विस्तार, समन्वय र नेतृत्व प्रदान गर्ने अपेक्षा सहित घिमिरेलाई मनोनयन गरिएको मनोनयन पत्रमा उल्लेख छ । राष्ट्रिय संकटका बेला सशक्त भूमिका निर्वाह गर्ने युथ काँग्रेस नेपालको उद्देश्यअनुरूप उनले जिम्मेवारी कुशलतापूर्वक निर्वाह गर्ने विश्वास लिइएको छ ।
