रामेछाप– रामेछापको सुनापति गाउँपालिकाले गाउँपालिकाबाट प्रवाह हुने विभिन्न सेवा गाउँमै पुगेर दिन थालेको छ । गाउँपालिकाले आइतबारदेखि एकीकृत घुम्ती शिविर मार्फत वडा कार्यालयबाट सेवा दिन थालेको हो । गाउँपालिकाबाट प्रवाह हुने एक दर्जन भन्दा बढी सेवा सहित गाउँपालिकाको टिम वडामा पुगेर नागरिकलाई सेवा दिन थालिएको सुनापति गाउँपालिकाका प्रमुख प्रशासकीय अधिकृत सुरेश कुमार श्रेष्ठले बताए । प्रशासकीय अधिकृत श्रेष्ठका अनुसार एकीकृत घुम्ती शिविरमा नयाँ व्यवसाय दर्ता, पुराना व्यवसाय नविकरण, जेष्ठ नागरिक परिचयपत्र वितरण, अपंगता परिचय पत्र नविकरण, परामर्श सहित कृषिजन्य विषादी वितरण, कृषक समूह दर्ता, माटो परीक्षण, पशुजन्य औषधी वितरण, पशुको क्यास्ट्रेसन तथा अन्य सामान्य उपचार, रेबिज खोप, योजना सम्झौता, ३० वर्ष माथिका महिलाहरुलाई भिआइए स्क्रिनिङ र रिङ पेशरी राख्ने र ५० वर्ष माथिका नागरिकहरूको आँखाको मोतीबिन्दु रोगको स्क्रिनिङ लगायतका १४ ओटा सेवा शिविरबाट दिने गरी एकीकृत घुम्ती शिविर राखिएको छ ।
पौष १३ गते सुनापति गाउँपालिका वडा नं १ मा आयोजना गरिएको शिविर १४ गते वडा नं २ मा, १५ गते वडा नं ३ मा, १६ गते वडा नं ४ मा र १७ गते वडा नं ५ मा गरिने प्रमुख प्रशासकीय अधिकृत सुरेश कुमार श्रेष्ठले बताए ।
‘नागरिकको सहजताको लागि गाउँमै सेवा’– अध्यक्ष तामाङ
सुनापति गाउँपालिकाका आम नागरिकको सहताको लागि गाउँपालिकाबाट प्रवाह हुने सेवा गाउँमै लगिएको गाउँपालिकाका अध्यक्ष ठुलोकान्छा तामाङले बताएका छन् । अध्यक्ष तामाङले भने– “स्थानीय सरकार भनेको गाउँका नागरिकको सरकार हो । उहाँहरूको सहजताको लागि हामीले गाउँमै सेवा लैजादा सेवाग्राहीलाई बल्ल सरकार भएको महसुस हुन्छ । त्यस कारण हामीले गाउँपालिकाबाट प्रवाह हुने सेवा गाउँ–गाउँमै लगेका हौँ ।” अध्यक्ष तामाङले वडा तहमै पुगेर दिन सुरु गरिएको निःशुल्क सेवा सबैलाई लिन आग्रह गरेका छन् ।
