रामेछाप- नेपाल सुनचाँदी कला व्यवसायी संघ जिल्ला शाखा रामेछाप २२ दिनदेखि जारी आन्दोलनलाई निरन्तरता दिँदै सोमबार करदाता सेवा कार्यालय मन्थलीमा धर्ना कार्यक्रम सम्पन्न गरेको छ । संघका कार्यवाहक अध्यक्ष तुल बहादुर विश्वकर्मा ‘कृष्ण’ को नेतृत्वमा आयोजित धर्नामा सहभागीहरूले कर कार्यालय प्रमुख कृष्ण आचार्यलाई औपचारिक रूपमा आफ्ना मागहरू बुझाउँदै कार्यालयको मूल गेट अगाडि करिब ४५ मिनेटसम्म धर्ना बसेका थिए । आन्दोलनका कारण कार्यालयको नियमित कामकाज प्रभावित भएको नेपाल सुनचाँदी व्यवसायी कालीगढ तथा संघर्ष समितिका सचिव सिताराम लोहारले जानकारी बताए ।
संघले चालु आर्थिक वर्ष २०८२/०८३ को बजेटमार्फत सुनचाँदी व्यवसायमाथि लागू गरिएको ६ प्रतिशत विलासिता करलगायतका अन्य करप्रति आपत्ति जनाउँदै त्यसको खारेजीको माग गर्दै आएको छ । व्यवसायीहरूका अनुसार यस्तो करले उपभोक्तामाथि प्रत्यक्ष असर पर्नुको साथै व्यवसाय धराशायी बनाउने खतरा रहेको छ।
संघले माग पुरा नभएसम्म आन्दोलन जारी रहने स्पष्ट पारेको छ । कार्यवाहक अध्यक्ष विश्वकर्माका अनुसार साउन १ गतेदेखि संघको केन्द्रीय निर्देशनअनुसार नयाँ चरणको संघर्ष कार्यक्रम सुरु गरिने छ ।
आन्दोलन अन्तर्गत जिल्लाका सबै सुनचाँदी पसल र साना उद्योगहरू अनिश्चितकालीन रूपमा बन्द गरिएको छ । व्यवसायीहरू सडकमा उत्रिएपछि सेवाग्राहीहरू आवश्यक सामग्री नपाएर समस्यामा परेका छन् । नियमित आर्थिक गतिविधि प्रभावित भएपछि स्थानीय बजारमै चहलपहलमा गिरावट आएको छ । संघले सरकारसँग तत्काल संवादमा बस्न र कर नीतिमा पुनर्विचार गर्न आग्रह गर्दै आन्दोलन थप सशक्त बनाउने चेतावनी दिइरहेको छ ।
