रामेछाप- नेपाल प्रेस युनियनको स्थापना दिवसको अवसरमा आयोजित रामेछाप शाखाको सप्ताहव्यापी कार्यक्रम सम्पन्न भएको छ । युनियनको ३४ औँ स्थापना दिवसको अवसर पारेर नेपाल प्रेस युनियन जिल्ला शाखा रामेछापले १३ गते देखि १९ गते सम्म विभिन्न कार्यक्रमको आयोजना गर्दै ३४ औँ स्थापना दिवस लक्षित कार्यक्रमहरू सम्पन्न गरेको हो ।
नेपाल प्रेस युनियन रामेछापले १३ गते मन्थली अस्पतालमा उपचाररत बिरामीको स्वास्थ्य लाभको कामना गर्दै फलफूल वितरण कार्यक्रमको आयोजना गरेको थियो भने १३ गते बेलुका नै स्थापनाको ३४ औँ वर्ष पुरा भएको खुसीयालीमा दीप प्रज्वलन गर्दै कार्यक्रम गरेको थियो ।
त्यस्तै १५ गते गणतन्त्र दिवसको अवसरमा सरोकारवालाहरूको सहभागितामा ‘लोकतन्त्रमा प्रेसको भूमिका’ विषयक अन्तरक्रिया कार्यक्रमको आयोजना गरेको थियो ।
एक हप्ता सम्म विभिन्न कार्यक्रम गरेको प्रेस युनियनले सोमबार जिल्लाका क्रियाशील पत्रकारहरूको निःशुल्क आँखा परीक्षण तथा चस्मा वितरण कार्यक्रम गर्दै सप्ताहव्यापी कार्यक्रम सम्पन्न गरेको छ । तिलगंगा आँखा प्रतिष्ठान अन्तरगत रहेको रामेछाप सामुदायिक आँखा केन्द्रको प्राविधिक सहयोगमा २८ जना पत्रकारहरूको आँखा परीक्षण गर्दै सप्ताहव्यापी कार्यक्रम सम्पन्न गरिएको नेपाल प्रेस युनियन रामेछाप शाखाको अध्यक्ष ज्ञानु श्रेष्ठले बताइन् । रामेछाप सामुदायिक आँखा केन्द्रको प्राविधिक सहयोगमा सम्पन्न भएको निःशुल्क शिविरमा २८ जनाको आँखा परीक्षण गराइएको र २५ जनालाई निःशुल्क चस्मा समेत उपलब्ध गराइएको अध्यक्ष श्रेष्ठले बताइन् ।
