रामेछाप– नेपाल तरुण दल रामेछापले जिल्ला सम्मेलन गर्ने भएको छ । शनिवार रामेछापको सदरमुकाम मन्थलीमा सम्पन्न नेपाल तरुण दल जिल्ला कार्य समिति रामेछापको बैठकले चैत्र ३ गते ‘तरुण जिल्ला सम्मेलन’ गर्ने निर्णय गरेको हो ।
नेपाल तरुण दल रामेछापका अध्यक्ष काजी बहादुर खड्का (दिनेश) को अध्यक्षतामा बसेको बैठकले नेपाली काँग्रेसको एउटा खम्बाको रूपमा रहेको तरुण दललाई थप सक्रिय र चलायमान बनाउनको लागि तरुण जिल्ला सम्मेलन गर्ने निर्णय गरिएको नेपाल तरुण दल रामेछापका सह–सचिव जीवन कार्कीले बताए । तरुण जिल्ला सम्मेलनमा तरुण दलको भावी कार्य योजना सहित वृहत् छलफल हुने र नेपाल तरुण दललाई एउटा उचाइमा पु¥याउँदै संगठनलाई थप सशक्त बनाउन मद्दत पुग्ने अपेक्षा लिइएको सह–सचिव कार्कीको भनाई रहेको छ । बैठकमा नेपाल तरुण दलका केन्द्रीय सदस्यहरू दिपेन्द्र खड्का, सौरभ केसी, योगेश श्रेष्ठ र रमेश खड्का सहित जिल्ला कार्यसमितिको पदाधिकारी, सदस्य तथा तरुण नेताहरुको उपस्थिति रहेको थियो ।
