रामेछाप– गोकुलगंगा गाउँपालिकामा गरिब लक्षित कार्यक्रम अन्तरगत व्यावसायिक कृषि गर्न पशुपालनको तालिम दिने देखि कृषि औजार बनाउने अत्याधुनिक इलेकट्रोनिक उपकरण सम्मका सामाग्री गाउँ–गाउँमा पुगेका छन् । गाउँपालिका भित्र रहेका आर्थिक रूपले विपन्न, अल्पसङ्ख्यक, दलित, सीमान्तकृत तथा पछाडि परेका समुदायलाई लक्षित गरी सञ्चालन गरिएको कार्यक्रमबाट व्यावसायिक रूपमा बाख्रा तथा बङ्गुर पालन तालिम, बेमौसमी खेती तालिम, अत्याधुनिक प्रविधियुक्त आरान चलाउने तालिम, नौमती बाजा बजाउने तालिम, जुत्ता बनाउने तालिम लगायतका कार्यक्रम सञ्चालन भएका छन् ।
तालिम पश्चात् पशुपालनको तालिम लिने ७० जनालाई बाख्रा तथा बङ्गुर, बेमौसमी खेतीको तालिम लिने १ सय ८० जनालाई टनेल, नौमती बाजाको तालिम लिने ४० जनालाई नौमती बाजा, इलेकट्रोनिक आरान चलाउन तालिम लिने ७ जनालाई अत्याधुनिक इलेकट्रोनिक फलाम कुट्ने मेसिन, जुत्ता बनाउन तालिम लिनेलाई जुत्ता बनाउने मेसिन लगायतका सामाग्री समेत निःशुल्क उपलब्ध गराइएको गोकुलगंगा गाउँपालिकाका प्रमुख प्रशासकीय अधिकृत होम बहादुर थापाले बताए । थापाका अनुसार गाउँपालिकाको आर्थिक सहयोग र ग्रामिण विजनेश प्रमोशन प्रालिको प्राविधिक सहयोगमा सम्पन्न भएको हो ।
‘गरिबलाई माथि उठाउने गाउँपालिकाको अभियान जारी छ, सबैले सहयोग गर्न आवश्यक छ’– अध्यक्ष खड्का
आफ्नो पाँच वर्षे कार्यकालमा आर्थिक तथा सामाजिक रूपले विपन्न भएका नागरिकलाई माथि उठाउने र संरक्षण गर्नु पर्ने परम्परागत पेशा तथा कामलाई आधुनिकीकरण गर्दै मुख्य पेशा बनाउने अभियान जारी राख्ने बताउँदै गाउँपालिका अध्यक्ष काजी बहादुर खड्का (दिनेश) ले यो अभियान सफल बनाउन सबैको सहयोगको आवश्यक रहेको धारणा व्यक्त गरे । अध्यक्ष खड्काले भने– ‘हामीले कार्यक्रम बनाएर समुदायमा पु¥याउने हो । त्यस्ता कार्यक्रम कार्यान्वयन गर्ने मुख्य जिम्मेवारी कार्यक्रममा सहभागी हुने नागरिकको बढी हुन्छ । त्यसैले विपन्न समुदायलाई हरेक हिसाबले माथि उठाउने गरी तयार गरिएका कार्यक्रमलाई सफल बनाउन उहाँहरूले नै बढी जिम्मेवारी लिनु पर्छ । कृषिलाई आधुनिकीकरण, पशुपालनलाई व्यावसायिक, परम्परागत रूपमा सञ्चालनमा रहेका कृषि औजार बनाउने आरनलाई प्रविधियुक्त, लोप हुँदै गएको पञ्चेबाजालाई संरक्षण गर्ने, गाउँमै जुत्ता बनाउने जस्ता कामलाई जसले लिएको हो उसैले मेरो मुख्य पेशा र व्यवसाय नै यही हो भनेर काम गर्न सके मात्रै त्यसको उपलब्धि हुने भएकाले त्यही अनुसार काम गर्न अनुरोध पनि गर्छु ।’
गरिब लक्षित गरी सञ्चालन गरिएको यस्ता कार्यक्रमले आगामी दिनमा विपन्न समुदायको जीवनस्तर माथि उठ्ने अपेक्षा गाउँपालिकाले लिएको अध्यक्ष खड्काले बताए । यो वर्ष ६ ओटै वडाका अति विपन्न व्यक्तिहरूलाई छनौट गरी कार्यक्रम कार्यान्वयन गरिएको उनको भनाई रहेको छ । आगामी वर्ष पनि यस्ता कार्यक्रमलाई निरन्तरता दिने उनले बताए ।
गाउँपालिका भित्र बसोबास गरी आफ्नो समुदाय अनुसार मनाउने विभिन्न प्रकारका संस्कारहरू पनि लोप हुने अवस्थामा पुगेको र त्यस्ता संस्कार जोगाउने अभियानमा आगामी दिनमा कार्यक्रम तयार गरी कार्यान्वयन गरिने पनि अध्यक्ष खड्काले बताए ।
गाउँपालिका उपाध्यक्ष उषादेवी कार्कीले गाउँपालिका भित्र रहेका दलित, अल्पसङ्ख्यक, सीमान्तकृत तथा पछाडि परेका समुदायलाई माथि उठाउने गरी सञ्चालन गरिएको कार्यक्रमले लोप हुँदै गएको पेशा संरक्षण हुने बताइन् । त्यस्तै आर्थिक रूपमा विपन्न भएको किसानलाई पशुपालन तथा बेमौसमी खेतीबाट आम्दानी लिन यो कार्यक्रमले मद्दत पु¥याउने उनले बताइन् ।
झन्डै ३ सय बढी स्थानीय सहभागी हुने गरी सञ्चालन गरिएको विभिन्न तालिममा १ नं वडा देखि ६ नं वडा सम्मका नागरिक समेटिएको ग्रामिण विजनेश प्रमोशन प्रा.लिका कार्यकारी अधिकृत युवराज सुवेदीले बताए ।
