रामेछाप– रामेछाप नगरपालिकाले गाउँ–गाउँमा उद्यमी उत्पादन गर्न सुरु गरेको छ । गरिवी निवरणको लागि लघु उद्यम विकास कार्यक्रम मार्फत यो वर्ष ७५ जनालाई गाउँमै लघु उद्यम संचान गर्न सक्ने गरी विभिन्न प्रकारका तालिमहरु संचालन गरेको हो ।
रामेछाप नगरपालिकाको आर्थिक सहयोग र ग्रामिण विजनेश प्रमोशन प्रा.लि.को प्राविधिक सहयोगमा ७५ जना नयाँ उद्यमी उत्पादन गर्ने र ४० जना पुराना उद्यमीहरुलाई स्तरोन्नति गर्ने गरी सुरु गरिएका केही तालिमहरु समापन भएका छन् भने केही तालिमहरु सुरु हुने चरणमा रहेका छन् ।
शुक्रबार रामेछाप नगरपालिकाको वडा नं ९ मा एक महिना अघि देखि संचालन भएको बाँस हस्तकला र हाउस वाइरिङ सम्बन्धी तालिमको समापन भएको छ । एक महिनाको अवधिमा बाँस हस्तकलामा २३ जना र हाउस वाइरिङमा १२ जना गरी ३५ जनाले गाउँमै काम तालिम सिकेका छन् । तालिममा सहभागीहरु गाउँकै बाँस प्रयोग गरी बाँसबाट बन्ने विभिन्न प्रकारका तयारी सामाग्री समेत बनाएका छन् ।
एक महिना अघि देखि संचालनमा रहेको तालिम समापन कार्यक्रममा बोल्दै रामेछाप नगरपालिकाका नगर प्रमुख लवश्री न्यौपानेले गाउँमै भएका कच्च पदार्थ प्रयोग गर्दै गाउँमा रोजगारी सिर्जना गर्ने गरी सुरु गरिएको उद्यमी उत्पादन तालिमसँग स्थानीयको रोजागरी, आर्थिक उन्नति र समृद्धि जोडिएकाले आर्थिक बृद्धिमा सहयोग पुग्ने बताए । नगर प्रमुखले भने– ‘गरिवी निवरणको लागि उद्यमी उत्पादन गर्दै लघु उद्यम स्थापना गर्ने गरी सुरु गरिएको यो तालिममा यहाँ सहभागी भएका स्थानीयको गरिवि उत्थान र बेरोजगार उत्थानमा सहयोग पुग्छ । यस्ता तालिमले पचास वर्ष पछि सम्मको आर्थिक समृद्धिमा टेवा पुग्छ, त्यसैले यो तालिम एउटा मानिसको जीवन परिवर्तन गर्न सक्ने एउटा माध्यम हो ।’
नगर प्रमुख न्यौपानेले तालिम सिकेर दक्ष जनशक्ती भइसकेकाहरुले व्यवसायिक रुपमा लघु उद्योग स्थापना गरी व्यवसाय गर्न चाहेमा नगरपालिकाले आवश्यक सहयोग गर्ने बताए । तालिम लिएका उद्यमीहरुले व्यवसायिक रुपमा उद्योग स्थापना गरेर धेरै बस्तु उत्पादन गर्न सके ति बस्तुहरुलाई बजार सम्म लैजाने जिम्मा नगरपालिकाले लिने प्रतिबद्धता जनाए ।
नगर प्रमुख न्यौपानेले आफू एउटा पार्टीबाट निर्वाचित भएर आएको भएपनि नगरको विकास र आम नागरिकको समस्या समधानको लागि आफूले पार्टीलाई पूर्ण रुपमा बिर्सेर काम गरीरहेको बताए ।
रामेछाप नगरपालिका वडा नं ९ का वडाध्यक्ष चन्द्र बहादुर श्रेष्ठले गाउँमै पाइने बस्तुबाट विभिन्न प्रकारका बस्तु उत्पादन गर्न सक्ने गरी दिइएको तालिमले उनिहरुको जीवनमा ठूलो सहयोग पुग्ने धारणा राखे ।
रामेछाप नगरपालिकाको उद्योग शाखाका प्रमुख हरीभगत श्रेष्ठले रामेछाप नगरपालिकाको ल्याङ–ल्याङ र गोठगाउँमा गरिएका तालिमले स्थानीयलाई व्यवसायिक उद्यमी बनाउन सहयोग पुर्याउने बताए । दुबै ठाउँमा कच्च पदार्थको रुपमा रहेका बस्तुको सम्भाव्यता अध्ययन गरेर तालिम संचालन गरिएको हुँदा अहिले दिइएको तालिम सफल हुने बताउँदै कार्यक्रमको लक्ष्य अनुसार लघु उद्योग स्थापना गरेर स्थानीयलाई व्यवसायमा जोड्न सहयोग पुग्ने बताए ।
त्यस्तै कार्यक्रममा बोल्दै ग्रामिण विजनेश प्रमोशन प्रा.लि. कार्यकारी अधिकृत युवारज सुवेदीले लामो समय देखि गैर सरकारी संस्थाहरुले गर्दै आएको कार्यक्रम स्थानीय सरकारले संचालन गर्ने गरी गाउँ–गाउँ पुगेको कार्यक्रम थप प्रभावकारी हुने भन्दै गरिवी निवरणमा सहयोग पुग्ने बताए ।
सीप विकासको जिम्मा लिएको ग्रामिण विजनेश प्रमोशन प्रालि रामेछापका कार्यक्रम संयोजक अनिवाश कार्कीका अनुसार ल्याङ–ल्याङ र गोठगाउँका विभिन्न ठाउँमा विभिन्न प्रकारका तालिमा सम्पन्न भइसकेको र बाँकी तालिमहरु पनि सुरु हुने तयारीमा रहेका छन् । कार्कीका अनुसार गोठगाउँमा यस अघि बेसार प्रसोधनको तालिम समापन भइसकेको छ ।
