रामेछाप– शिक्षा विकास तथा समन्वय इकाई रामेछापका प्रमुखले शिक्षक नियुक्तमा व्यापक चलखेल गरेका छन् । प्रावि तह तृतिय श्रेणीका नयाँ शिक्षक नियुक्तीमा नियुक्तीका लागि निवेदन शुल्क बुझाएका तीन जनालाई इकाई प्रमुख भरत बहादुर भट्टराइले नियुक्त नै नदिइ गोलमोटलमा बाँकीलाई मात्रै नियुक्त दिएका छन् ।
योग्यताक्रमको आधारमा नियुक्ती दिँदा अहिले दुर्गम पालिका पुग्ने भएपछि उनले केही दिनमा नजिकैको पालिका पठाउने योजना सहित नियुक्ती नदिएका हुन् । भट्टराइले शक्तिको प्रयोग गरी योग्यताक्रममा अगाडि रहेकालाई अहिले दुर्गम पालिका पठाउने र योग्यताक्रममा धेरै पछाडि रहेकालाई केही दिनपछि सदरमुकाम र आसपास पार्ने उद्देश्यले अहिले नियुक्त नदिएको उनको यो कार्यले छर्लगं पारेको छ ।
शिक्षा विकास तथा समन्वय इकाई रामेछापले मिति २०७९ चैत्र ६ गते स्थायी शिक्षक नियुक्तीमा प्राथमिकताक्रमलाई मध्यनजर गरी स्थानीय तह छनौट गरेर चैत्र १० गते भित्र फाराम भरी निवेदन पेश गर्न माग गरेको थियो । सोही अनुसार प्रावि तह तृतिय श्रेणीमा रामेछाप जिल्लाका लागि नाम निकालेका ७२ जना मध्ये ७१ जनाले फाराम भरी पालिका रोजेर निवेदन दिएका थिए । तर इकाई प्रमुखले योग्यताक्रमको ५७, ६६ र ७० नम्बरमा रहेकालाई बाँकी राखेर अन्य ६८ जनलाई मात्रै पालिका जान नियुक्ती दिएका छन् ।
चैत्र ६ गते प्रकाशन गरेको सूचनामा ८ पालिकामा रिक्त दरवन्दी संख्यामा ७२ जना उल्लेख छ । तर भट्टराईले सोमबार नियुक्ती दिँदा ६८ जनालाई मात्रै नियुक्ती दिएका छन् । सबै पालिकामा गरेर ७२ जना रिक्त दरबन्दी रहेकाले सोही अनुसार पठाउनु पर्ने भएपनि आफैले प्रकाशन गरेको सूचनालाई बेवास्ता गरेर कुनै पालिकामा बढी र कुनै पालिकामा घटी पठाएका छन् । उनले रामेछाप नगरपालिकामा ८ जना रिक्त रहेको सूचना प्रकाशन गरेको भएपनि १ जना थप गरेर ९ जना पठाएका छन् । त्यस्तै उमाकुण्ड गाउँपालिकामा ५ जना रिक्त रहेको देखाएको भएपनि ४ जना, लिखुतामाकोशी गाउँपालिकामा ५ जना रिक्त देखाएपनि ४ जना र दोरम्बा शैलुङ गाउँपालिकामा ८ जना रिक्त रहेको भएपनि ५ जना मात्रै पठाएका छन् ।
फाराम किनेको रसिद छ तर, फाराम भरेका छैन भनेर गैरजिम्मेवार जबाफ दिन्छन् इकाई प्रमुख भट्टराई
तीन जनालाई चाहि किन नियुक्ती नदिएको ? भन्ने पत्रकारको प्रश्नमा उनले फाराम नै नभरेका मान्छेलाई अहिले नियुक्त दिन मिल्दैन भनेर ढाकछोप गर्ने प्रयास गरे । तीन जनालाई कहिले नियुक्ती दिनु हुन्छ ? भन्ने हाम्रो प्रश्नमा उनले ‘मेरो तजबिजले दिन्छु’ भन्दै गैरजिम्मेवार जबाफ दिएका छन् ।
नियुक्ती नलिएका तीन जनाले १० गते सम्म फाराम नभरेको बताएपनि उनले १३ गते सम्म पुनः फाराम भर्नलाई सूचना गरेका छैनन् ।भट्टराईले चैत्र १३ गतेकै मितिमा तीन जनालाई नियुक्ती नदिने हो भने उनिहरुको बढुवामा समेत असर पर्ने छ ।
(पैसा तिरेको ररिद, पालिकामा रिक्त सहितको सूचना र हाल पदास्थापना भएको प्रमाण हामीसँग सुरक्षित छन् ।)
