रामेछाप– काभ्रे जिल्लाको तेमाल गाउँपालिका वडा नं ९ मच्छेपौवाका निखिल भन्ने तिर्थमान दोङ तामाङको हत्यामा संलग्न भएको आरोपमा रामेछापका दुई व्यक्ति पक्राउ परेका छन् । तिर्थमानको १२ वर्ष अघि रामेछापको खाँडादेवी गाउँपालिका वडा नं १ राकाथुममा हत्या भएको थियो । तिर्थमानका आफान्त पृथीमान दोङले खाँडादेवी गाउँपालिका–१ राकाथुमका ज्ञान बहादुर तामाङ र उनका छोरा जयराम तामाङ सहितको समूहले हत्या गरेको भन्दै प्रहरीमा किटानी जाहेरी दिएका थिए ।
जाहेरीको दिइएको १२ वर्ष सम्म पनि कुनै सुनुवाई नभएको भन्दै पीडित परिवारले बारम्बार गुनासो गर्दै आएपछि जिल्ला प्रहरी कार्यालय रामेछापले थप अनुसन्धन थालेको थियो । जाहेरी अनुसार अनुसन्धन थालेको प्रहरीले हत्यामा संलग्न भएको भनिएका खाँडादेवी गाउँपालिका–१ राकाथुमका ज्ञान बहादुर तामाङ र उनका छोरा जयराम तामाङलाई शनिबार पक्राउ गरिएको जिल्ला प्रहरी कार्यालय रामेछापका प्रहरी प्रमुख प्रहरी नायव उपरीक्षक नवराज ढुंगानाले बताए ।
पक्राउ परेका दुई मध्ये ज्ञान बहादुर राकाथुमबाट र जयराम तामाङलाई काभ्रे प्रहरीको सहयोगमा काभ्रेको धुलिखेलबाट पक्राउ गरिएको प्रहरी नायव उपरिक्षक ढुंगानाले बताए ।
पक्राउ परेका बाबु छोरासहितको समुहले तिर्थमानलाई पुरानो रिसिइबी भएकाले खुकुरी र तरबार प्रहार गरेर हत्या गरेको प्रहरी समक्ष पीडित परिवारले दिइएको किटानी जाहेरीमा उल्लेख छ ।
