रामेछाप– नेपाल तरुण दल रामेछापका अध्यक्ष काजी बहादुर खड्का ‘दिनेश’ ले आफ्नो जन्म दिनमा आफ्नै गाउँका जेष्ठ नागरिकसँग खुसी साट्दै जन्म दिन मनाएका छन् । अध्यक्ष खड्काले आफू जन्मेको ठाउँ गोकुलगंगा गाउँपालिका वडा नं ५ नामाडीमा जन्म दिनको अवसर पारेर ८० वर्ष पार गरेका जेष्ठ नागरिकरुलाई न्यानो कपडा वितरण गर्दै आफ्नो जन्म दिन मनाएका हुन् ।
आफू जन्मेको दिन अरु दिन भन्द विशेष दिन हुने हुँदा गाउँका जेष्ठ सदस्यहरुसँग आर्शिवाद लिदै जन्म दिन मनाएको अध्यक्ष खड्काले बताए । अध्यक्ष खड्काले हाम्रो प्रहार डटकमसँग कुरा गर्दै भने– ‘आज म जन्मेको विशेष दिन भएकाले समाजमा भएका जेष्ठ नागरिकहरुसँगै रमाउने सोचका साथ उहाँहरुको घर आगनमै पुगेर खुसी साटे । उहाँहरुबाट मैले धेरै कुरा सिक्नुका साथै आर्शिवाद पनि लिएको छु । जन्म दिनको अवसर पारेर मैले आफ्नै गाउँका ८० वर्ष माथिका एक सय भन्दा बढी बुबा–आमाहरुलाई न्यानो कपडा पनि वितरण गरेको छु । यसरी उहाँहरुसँग रमाउन पाउँदा मैले आफूलाई भाग्यमानी ठानेको छु ।’
अध्यक्ष खड्काले महिला जेष्ठ नागरिकलाई जाडोमा ओढ्ने पछ्यौरा र जेष्ठ पुरुषलाई जाडोमा लगाउने ज्याकेट वितरण गरेका छन् ।
