रामेछाप– रामेछापको सदरमुकाम मन्थली नजिकै रहेको विटार पार्कले अहिले सबैको ध्यान खिचेको छ । अहिले यहाँ बनेका विभिन्न प्रकारका संरचनाहरु हेर्न दैनिक जसो सयौंको संख्यामा मानिसहरु आउछन् । केही समय अघि जारी भएको नेपालको नक्सा देखि सगरमाथाको आकृति सम्म हेर्न पाइने विटार पार्कमा अहिले अर्का दुई ठुला संरचना पनि थपएिका छन् । ति दुई संरचना हुन् विटार पार्क लगायत आसपासको दृश्य देखिने सेल्फी टावर र काठमाण्डौमा रहेको धरहराको नमूना ।
लकडाउनको समयमा रासमले (रामेछापका सहयोगी मनहरु) गौचरणमा परिणत भएको विटारलाई पार्कको रुपमा चिनाउदै पर्यटक भित्र्याउन सुरु गरेको अभियान अहिले सफल भएको छ । सफल हुनुमा यहाँ सबैले कुनै स्वार्थ नराखी सहयोग गर्नु हो । विटार पार्कमा रहेका विभिन्न बस्तुका नमूना, आकृति र संरचनाहरु निर्माणमा समाजसेवी, राजनीतिक दलका नेता र स्थानीय सरकारले सहयोग गर्दै आएका छन् । शनिबारबाट संचालनमा आएको सेल्फी टावर निर्माणको लागि नेपाली काँग्रेस महासमिति सदस्य भरत चौलागाईले सहयोग गरेका छन् । त्यस्तै शनबिार नै पर्यटकका लागि खुला गरिएको मिनी धरहराको नमूना निर्माणको लागि नेशनल ब्रिडिङ फार्म प्रा.लिले सहयोग गरेको छ ।
चौलागाईको आर्थिक सहयोगमा बनेको सेल्फी टावर र नेशनल ब्रिडिङ फार्म प्रा.लिले निर्माण गरेको मिनी धरहरा शनिबार एक कार्यक्रमको आयोजना गरी विटार पार्क संरक्षण समिर्ति हस्तान्तरण गरिएको छ ।
सेल्फी टावर र मिनी धरहरा हस्तान्तरण कार्यक्रममा बोल्दै रामेछाप नगरपालिकाका नगर प्रमुख नर बहादुर थापामगरले एउटा स्वतन्त्र समूहले सुरु गरेको काममा सुरुदेखि नै नगरपालिकाले सहयोग गर्दै आएको र आगामी दिनमा पनि सहयोग गर्ने बताए । रामेछाप नगरपालिकाको वडा नं ८ मा रहेको विटार पार्कमा तारबार लगाउन र बहिरी गेट बनाउन पार्क निर्माणको सुरुमै आर्थिक सहयोग गरेको नगरपालिकाले पार्कलाई थप व्यवस्थित बनाउन चालु आर्थिक वर्षका लागि दश लाख छुट्याएको पनि नगर प्रमुख थापामगरले बताए । रामेछाप नगरपालिकाको प्रवेशद्वारका रुपमा रहेको विटार पार्कलाई व्यवस्थित बनाउनको लागि डिपिआर तयार गरेर काम गरिने पनि नगर प्रमुखको भनाई रहेको छ । त्यस्तै कार्यक्रममा बोल्दै मन्थली नगरपालिकाका नगर प्रमुख रमेश कुमार बस्नेतले मन्थली नगरपालिकाको केन्द्र नजिकै रहेको विटार पार्कलाई थप रमणिय र व्यवस्थित बनाउनको लागि मन्थली नगरपालिकाले पनि सहयोग गर्ने बताए । पार्क रामेछाप नगरपालिकामा पर्ने भएपनि मन्थली नगरपालिकाले बढी उपभोग गर्ने भएकाले विटार पार्कको आसपासको क्षत्रलाई समेत समेटेर विकास गर्नु पर्नेमा नगर प्रमुख बस्नेतको जोड रहेको छ ।
नेशनल ब्रिडिङ फार्म प्रा.लिका संचालक रुद्र श्रेष्ठको अध्यक्षतामा भएको कार्यक्रममा रामेछापका प्रमुख जिल्ला अधिकारी अर्जुन कुमार शर्मा, नेपाल नेपाली काँग्रेस रामेछापका पुर्व पार्टी सभापति रामचन्द्र खड्का, नेपाली काँग्रेस महासमिति सदस्य भरत चौलागाई, रामेछाप नगरपालिका– ८ का वडाध्यक्ष केदार कार्की, नेपाल पत्रकार महासंघ बागमती प्रदेशका सदस्य बद्री नयाँघरे, विटार पार्क संरक्षण समितिका उपाध्यक्ष हरिशचन्द्र घिमिरे लगायतले आ–आफ्नो भनाई राख्दै सहयोगी मनहरु सबैलाई धन्यबाद दिएका छन् ।
सेल्फी टावर निर्माणको लागि तीन लाख सहयोग गरेका भरत चौलागाईले पार्कलाई थप व्यवस्थित बनाउनको लागि फेरि एक लाख सहयोग गर्ने प्रतिवद्धता जनाएका छन् ।
थप तस्विरमा हेरौँ
