रामेछाप– नेपालमा कोरोना भाइरसका संक्रमितहरु बढ्दै जान थालेपछि सामुदायिक प्रहरी सेवा केन्द्र रामेछापले माक्स र सावुन वितरण गरेको छ । देशैभरी तिव्र रुपमा फैलिई रहेको कोरोना भाईरस समुदय स्तरमा नफैलियोस भन्ने उद्देश्य सहित सामुदायिक प्रहरी सेवा केन्द्र रामेछापले मन्थली नगरपालिकाको वडा नम्बर ६ सेलेघाट स्थित माझी समुदयमा पुगेर माक्स र सावुन वितरण गरेको हो ।
विभिन्न जिल्लाबाट रामेछाप प्रवेश गर्ने मुख्य नाकाको रुपमा रहेको सेलेघाटमा बुधबार आयोजना गरिएको एक कार्यक्रममा रामेछापका प्रहरी प्रमुख प्रहरी नायव उपरिक्षक बसन्त पाठकले उक्त समुदायका स्थानीय र त्यही बाटो भएर हिड्ने मानिसहरुलाई माक्स र सावुन वितरण गर्नुभएको छ । माक्स र सावुन वितरण गर्दै प्रनाउ पाठकले मानिसहरुको भिड भएको ठाउँमा हिड्दा नियमित माक्स लगाउने, नियमित रुपमा सावुन पानीले हात धुने र स्वास्थ्य सुरक्षाका मापदण्ड पूरा गर्न सके कोरोनाबाट बच्न सकिने हुँदा स्वास्थ्य सुरक्षाका सबै मापदण्ड पालना गर्न आग्रह पनि गर्नुभयो । करिव एक सय जनालाई वितरण गरिएको माक्स र सावुन आइ एम इ सेन्टर प्रथमा मनि ट्रान्सफरका संचालक एवं रामेछाप उद्योग वाणिज्य संघका सचिब सुरेश उदासले उपलब्ध गराउनुभएको थियो ।
सामुदायिक प्रहरी सेवा केन्द्र रामेछापका अध्यक्ष बिरेन्द्र श्रेष्ठको अध्यक्षतामा भएको कार्यक्रममा अध्यक्ष श्रेष्ठ र पत्रकार टीकाप्रसाद भट्टले कोरोनाको महामारीबाट बच्ने उपायको बारेमा धारणा राखेका थिए ।
यसपछि भिरपानीको सित्खा र राकाथुमको लुभुघाटमा समेत मास्क र साबुन वितरण गर्ने कार्यक्रम रहेको सामुदायिक प्रहरी सेवा केन्द्रले बताएको छ ।
