रामेछाप- रसुवा जिल्लाको भोटेकोशी नदी तथा तटीय क्षेत्रमा आएको विनासकारी बाढीका कारण प्रभावित भएका नागरिकहरूको खोज, उद्धार तथा राहतका लागि रामेछापको गोकुलगंगा गाउँपालिकाले २२ लाख ६ हजार ५ सय ७० रुपैयाँ आर्थिक सहयोग गर्ने भएको छ । गाउँपालिकाको मिति २०८३ भदौ १४ गते बसेको कार्यपालिका बैठकले प्रधानमन्त्री दैवी प्रकोप उद्धार कोषमा एकमुष्ट सो रकम जम्मा गर्ने निर्णय गरेको हो ।
गाउँपालिकाका अध्यक्ष काजी बहादुर खड्का र प्रमुख प्रशासकीय अधिकृत दिनेश भट्टराईद्वारा जारी संयुक्त विज्ञप्ति अनुसार उक्त सहयोग रकम जुटाउन गाउँपालिकाको विपद् व्यवस्थापन कोषबाट १ लाख रुपैयाँ तथा सम्पूर्ण जनप्रतिनिधिहरूको मासिक पारिश्रमिकको १० प्रतिशत बराबर हुन आउने ३९ हजार ३ सय ५० रुपैयाँ उपलब्ध गराइनेछ । यसैगरी, गाउँपालिका भूगोलभित्र कार्यरत अधिकृतस्तरका कर्मचारी र उ.मा.वि./मा.वि. तहका शिक्षकहरूको ७ दिनको तलब बराबर ५ लाख ६० हजार १ सय ५० रुपैयाँ, सहायकस्तरका कर्मचारी तथा नि.मा.वि./प्रा.वि. तहका शिक्षकहरूको ५ दिनको तलब बराबर १३ लाख ७५ हजार २ सय ९० रुपैयाँ र श्रेणीविहीन कर्मचारीसहित विद्यालयका कार्यालय सहयोगी, बाल सहायक तथा लेखा कर्मचारीहरूको २ दिनको तलब बराबर हुन आउने १ लाख ३१ हजार ७ सय ८० रुपैयाँ कट्टी गरी जम्मा गरिने भएको छ ।
यसैबीच, रोजगारी तथा विभिन्न कामका सिलसिलामा बाढी प्रभावित क्षेत्रमा पुगेर हालसम्म सम्पर्कविहीन रहेका गोकुलगंगा गाउँपालिकाका नागरिकहरूको खोजतलास कार्य सहज बनाउन पीडित परिवारलाई तत्काल प्रति परिवार २५ हजार रुपैयाँका दरले खर्च उपलब्ध गराइने निर्णय समेत गाउँपालिकाले गरेको छ । हालसम्मको जानकारी अनुसार सम्पर्कविहीन हुनेहरूमा बेतालीका ईश्वर बहादुर खड्का (कुमार), लिल बहादुर वि.क. (राजु), सुरज श्रेष्ठ तथा रस्नालुका सम्राट शेर्पा (प्रहरी) लगायत रहेका छन् । उनीहरूको खोजी कार्यलाई तीव्र बनाउन गाउँपालिकाले सम्बन्धित निकायहरूसँग अनुरोध गरेको छ ।
प्राकृतिक विपद्को यस कठिन घडीमा गाउँपालिकाले सबै तहका सरकार, सुरक्षा निकाय, सञ्चार जगत् र नागरिक समाजलाई एकीकृत रूपमा राहत, उद्धार र पुनःस्थापनामा जुट्न अपिल गर्दै आफ्नो तर्फबाट हरसम्भव सहयोग गर्न प्रतिबद्ध रहेको जनाएको छ ।
