रामेछाप– रामेछाप उद्योग वाणिज्य संघका पूर्वअध्यक्षहरूले संघको आगामी नेतृत्वका लागि प्रकाशकुमार श्रेष्ठलाई समर्थन गर्न आग्रह गरेका छन् । संघको १५औँ वार्षिक साधारणसभा तथा ९औँ जिल्ला अधिवेशन नजिकिँदै गर्दा पूर्वअध्यक्षहरूले संयुक्त अपिल जारी गर्दै व्यवसायीहरूलाई एकताबद्ध भई प्रकाश कुमार श्रेष्ठको पक्षमा मतदान गर्न अनुरोध गरेका हुन् । संघका पूर्वअध्यक्षहरू लोकबहादुर श्रेष्ठ, नारायणदास श्रेष्ठ, पशुपतिबहादुर खड्का, श्याम थापा र केशवप्रसाद घिमिरेले आइतबार संयुक्त रूपमा अपिल जारी गर्दै संघका सदस्यहरुलाई अनुरोध गरेका हुन् ।
अपिलमा संघको अधिवेशनको सन्दर्भमा जिल्लाका उद्योगी तथा व्यवसायीहरूबीच सहमति, सहकार्य र एकताको वातावरण बनाउन विभिन्न प्रयासहरू गरिएको उल्लेख गरिएको छ । सो प्रयासबाट १५ सदस्यीय कार्यसमितिमा पदाधिकारीसहित १४ जना निर्विरोध निर्वाचित भइसकेका छन् । यद्यपि अध्यक्ष पदका लागि सहमति कायम हुन नसकेपछि मतदान प्रक्रियाबाट नेतृत्व चयन गर्नुपर्ने अवस्था आएको जनाइएको छ । अध्यक्ष पदका लागि वरिष्ठ उपाध्यक्ष प्रकाशकुमार श्रेष्ठ र महासचिव कुमार श्रेष्ठ प्रतिस्पर्धामा रहेका छन् ।
पूर्वअध्यक्षहरूले संयुक्त रूपमा जारी गरेको अपिलमा निर्विरोध निर्वाचित पदाधिकारी तथा कार्यसमिति सदस्यहरूलाई बधाई दिँदै सफल कार्यकालको शुभकामना व्यक्त गरिएको छ । साथै, उनीहरूले चैत २० गते हुने अधिवेशनमा प्रकाशकुमार श्रेष्ठलाई अध्यक्ष पदमा विजयी गराउन सबै सदस्यहरूसँग हार्दिक अपिल गरेका छन् ।
अपिलमा संस्थाको हित, स्थायित्व र प्रभावकारी नेतृत्वका लागि प्रकाशकुमार श्रेष्ठ उपयुक्त उम्मेदवार रहेको उल्लेख गर्दै उनलाई अत्यधिक मतका साथ विजयी गराउन आग्रह गरिएको छ ।
