रामेछाप- आगामी फागुन २१ गते हुने प्रतिनिधिसभा सदस्य निर्वाचनलाई स्वच्छ, स्वतन्त्र, निष्पक्ष र भयरहित वातावरणमा सम्पन्न गर्न रामेछाप आजदेखि नेपाली सेना परिचालन भएको छ । एकीकृत सुरक्षा योजना– २०८२ अनुरूप बुधबार बिहानदेखि ४ सय बढी नेपाली सेना परिचालन गरिएको प्रमुख जिल्ला अधिकारी एवं जिल्ला सुरक्षा समिति रामेछापका अध्यक्ष श्याम कृष्ण थापाले बताए । निर्वाचनको मिति आउन करिब एक महिना बाँकी रहँदा सुरक्षा व्यवस्थालाई चुस्त, दुरुस्त र प्रभावकारी बनाउने उद्देश्यले जिल्लाका विभिन्न ठाउँमा नेपाली सेना परिचालन गरिएको प्रजिअ थापाले बताए । सुरक्षा व्यवस्थाको लागि नेपाली सेना, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग र निर्वाचन प्रहरी एकीकृत रूपमा परिचालित हुने छन् ।
सुरक्षा योजनाअनुसार नेपाली सेनाले सुरक्षा घेराको बाहिरी तहमा रही निर्वाचन सुरक्षाको महत्वपूर्ण जिम्मेवारी सम्हाल्नेछ भने भित्री सुरक्षा व्यवस्थापन नेपाल प्रहरी र सशस्त्र प्रहरीले गर्नेछन् । निर्वाचनलाई शान्तिपूर्ण, सुरक्षित र विश्वसनीय बनाउन सम्पूर्ण सुरक्षा निकायबीच समन्वय गरी काम अघि बढाइने प्रशासनले जनाएको छ ।
