रामेछाप– आगामी फागुन २१ गते हुने प्रतिनिधि सभा सदस्य पदको निर्वाचनका लागि रामेछाप जिल्लाबाट नेपाली काँग्रेसले रामचन्द्र खड्कालाई उम्मेदवार बनाउने निर्णय गरेको छ । पार्टीको केन्द्रीय निर्णयअनुसार खड्काले प्रतिनिधि सभा सदस्य पदका लागि टिकट पाएका हुन् ।
टिकट पाएको विषयमा हाम्रो प्रहार डटकमको प्रश्नमा प्रतिक्रिया दिँदै खड्काले आफूलाई नेपाली काँग्रेसले आधिकारिक उम्मेदवारको रूपमा चयन गरेको पुष्टि गरे । “पार्टीले दिएको जिम्मेवारीलाई मैले गम्भीरतापूर्वक लिएको छु । संगठन र जनताको विश्वासलाई मतमा बदल्ने गरी चुनावी अभियान अघि बढाइनेछ,” उनले भने ।
काँग्रेसको उम्मेदवार छनोट प्रक्रियामा खड्कासहित पाँच जना नेताहरूको नाममा दिनभर छलफल चलेको थियो ।
रामचन्द्र खड्का यसअघि २०७० सालमा सम्पन्न संविधान सभा सदस्य निर्वाचनमा रामेछाप क्षेत्र नं २ बाट नेपाली काँग्रेसकै तर्फबाट उम्मेदवार बनेका थिए । शिक्षण पेशामा आबद्ध खड्का शिक्षासँगै राजनीतिमा पनि सक्रिय रहँदै आएका नेता हुन् । उनी नेपाली काँग्रेस रामेछापको जिल्ला सभापति भएर डेढ दशकभन्दा बढी समय नेतृत्वदायी भूमिकामा रहेर काम गरिसकेका छन् ।
पार्टी संगठन विस्तार, कार्यकर्ताबीच एकता कायम राख्न र जिल्लामा काँग्रेसको आधार मजबुत बनाउन खड्काको योगदान उल्लेखनीय रहेको काँग्रेस नेताहरू बताउँछन् ।
