रामेछाप- रामेछाप अस्पतालमा पहिलो पटक हड्डी भाँचिएको विरामीको शल्यक्रिया सफलतापूर्वक सम्पन्न गरेको भएको छ । अस्पतालमै अर्थोपेडिक विशेषज्ञसहितको टिमले एकै दिन दुई वटा जटिल शल्यक्रिया सफलतापूर्वक सम्पन्न गरेसँगै जिल्लामै हड्डीसम्बन्धी उपचार सेवाको औपचारिक सुरुवात भएको छ । अस्पताल स्रोतका अनुसार शल्यक्रियाअन्तर्गत ६३ वर्षीया महिलाको खुट्टाको हड्डी भाँचिएको (Distal Fibula Fracture) अवस्थामा स्टिल प्लेट हाल्ने शल्यक्रिया (ORIF with Plating) गरिएको हो यसैगरी ३५ वर्षीया महिलाको पहिल्यै राखिएको रड निकाल्ने (Femur Nail Removal) शल्यक्रिया पनि सफलतापूर्वक सम्पन्न भएको अस्पतालका मे.सु सागर जर्घामगरले बताए ।
शल्यक्रिया अर्थोपेडिक सर्जन मे.सु. डा. सागर जर्घामगर र अर्थोपेडिक सर्जन डा. नवीन कुमार यादवको नेतृत्वमा सम्पन्न भएको बताइएको छ । शल्यक्रियामा एनेस्थेसिया टेक्निसियन राजेश यादव, स्क्रब नर्स समिक्षा थापा तथा अन्य स्वास्थ्यकर्मीहरूको सक्रिय सहभागिता शल्यक्रिया सम्पन्न भएको डा जर्घामगरले बताए ।
यसअघि हड्डी भाँचिने जस्ता केसमा रामेछापका बिरामीहरूलाई काठमाण्डौंका अस्पतालमा रिफर गर्नुपर्ने बाध्यता थियो । जसका कारण बिरामी र आफन्तले आर्थिक, मानसिक तथा समयको ठूलो भार बेहोर्नु परिरहेको थियो । अब भने जिल्लामै यस्ता शल्यक्रिया सेवा सुरु भएसँगै बिरामीलाई सहज, सुलभ र किफायती उपचार उपलब्ध हुने विश्वास लिइएको छ ।
अस्पतालले यो सफल शल्यक्रियालाई रामेछाप अस्पतालमा विशेषज्ञ सेवाको विस्तारतर्फको महत्वपूर्ण उपलब्धि भएको बताएको छ । अर्थोपेडिक (हड्डीसम्बन्धी) बाहिरङ्ग सेवा र शल्यक्रिया सेवा दुबैलाई चरणबद्ध रूपमा अझ प्रभावकारी बनाउँदै लैजाने तयारी भइरहेको रामेछाप अस्पताल व्यवस्थापन तथा संचालन समितिका अध्यक्ष यमकुमार पाख्रिनले बताए । अध्यक्ष तामाङले भविष्यमा दुर्घटना, हड्डी भाँचिने, जोर्नीसम्बन्धी समस्या तथा अन्य अर्थोपेडिक केसहरूको उपचार जिल्लामै सम्भव हुने वातावरण बनाउने लक्ष्य लिइएको बताए ।
