काठमाण्डौं- नेपाल जेसीजको वर्ष २०२६ का लागि नयाँ नेतृत्व चयन गर्न आइतबार राष्ट्रिय अध्यक्ष पदको निर्वाचन हुने भएको छ । जनकपुरधाममा सुरु भइसकेको नेपाल जेसीजको ५२औँ राष्ट्रिय अधिवेशनअन्तर्गत अध्यक्ष पदका लागि रामेछापका युवा नेता जीवन कार्की चुनावी मैदानमा उत्रिएका छन् ।
अध्यक्ष पदका प्रत्यासी कार्कीले आफ्नो जित सुनिश्चित भइसकेको दाबी गर्दै अधिवेशनमा सहभागी प्रतिनिधिहरूको व्यापक समर्थन आफूले पाएको बताएका छन् । “देशभरका जेसीज सदस्यहरूसँगको निरन्तर संवाद, विश्वास र सहकार्यले मलाई जिततर्फ अग्रसर बनाएको छ,” उनले भने, “यो निर्वाचन केवल व्यक्तिगत जित होइन, नेपाल जेसीजलाई नयाँ उचाइमा पु¥याउने अवसर हो ।”
जनकपुरधाममा भइरहेको ५२औँ राष्ट्रिय अधिवेशनमा कार्कीले आफ्नो स्पष्ट दृष्टिकोण, रणनीति र कार्ययोजना प्रस्तुत गर्ने तयारी गरेका छन् । संगठनभित्र देखिएका चुनौती, युवा नेतृत्वको सशक्तिकरण, संस्थागत सुशासन र सामाजिक उत्तरदायित्वलाई केन्द्रमा राख्दै उनले आफ्नो नेतृत्वलाई परिणाममुखी बनाउने प्रतिबद्धता जनाएका छन् ।
रामेछापबाट आफ्नो जेसीज यात्रा सुरु गरेका जीवन कार्की सन् २०१५ मा नेपाल जेसीजको साधारण सदस्य बनेका थिए । संगठनप्रतिको समर्पण, सक्रियता र नेतृत्व क्षमताका कारण उनी क्रमशः जिम्मेवारीमा अगाडि बढ्दै गए । सन् २०२१ मा शाखा अध्यक्ष, २०२२ मा राष्ट्रिय उपाध्यक्ष र २०२३ मा राष्ट्रिय कार्यकारी उपाध्यक्षको भूमिकामा रहेर उनले संगठनभित्र महत्वपूर्ण योगदान दिएका छन् ।
नेपाल जेसीजको ५१औँ राष्ट्रिय अधिवेशनमा पनि अध्यक्ष पदका उम्मेदवार बनेका कार्की त्यसबेला अत्यन्तै कम मतान्तरले पराजित भएका थिए । त्यतिबेला उनलाई “मन जिते तर मतले हारे” भन्ने उपमा दिइएको थियो, जसले उनको इमानदार, शालीन र प्रेरणादायी नेतृत्वशैलीलाई झल्काएको थियो ।
यसपटक कार्कीले ‘प्रोजेक्ट संकल्प २०२६’ लाई आफ्नो मुख्य अभियानका रूपमा अघि सारेका छन् । उक्त परियोजनाले संगठनभित्र एकता, पारदर्शिता, सहकार्य र समावेशितालाई संस्थागत गर्ने लक्ष्य लिएको छ ।
उनका अनुसार, नेतृत्व भनेको केवल पद प्राप्त गर्नु मात्र होइन, संगठन र समाजमा सकारात्मक परिवर्तन ल्याउने जिम्मेवारी हो । “नेतृत्व केवल कुर्सीमा बस्नु होइन, सदस्यहरूको सपना, संगठनको मूल्य र समाजप्रतिको दायित्वलाई एकैसाथ अघि बढाउने प्रक्रिया हो,” कार्कीले भने ।
उनले स्पष्ट लक्ष्य निर्धारण, योजनाबद्ध कार्यान्वयन र सामूहिक प्रयासबाट मात्र साझा सफलता हासिल गर्न सकिने उल्लेख गरे । “दृढ इच्छाशक्ति र इमानदार प्रयासबाट नेपाल जेसीजलाई अझ सशक्त, प्रभावकारी र विश्वसनीय संस्था बनाउन सकिन्छ,” उनले थपे ।
अधिवेशनमा सहभागी विभिन्न शाखा र क्षेत्रीय प्रतिनिधिहरूले पनि कार्कीको नेतृत्व अनुभव, निरन्तरता र संगठनप्रतिको प्रतिबद्धतालाई सकारात्मक रूपमा लिएको र संगठनलाई स्थायित्व, नवप्रवर्तन र परिणाममुखी नेतृत्वतर्फ डो¥याउन सक्ने क्षमताका कारण उनी बलियो प्रत्यासीका रूपमा रहेको रामेछाप जेसिज वर्ष २०२६ का लागि निर्वाचित अध्यक्ष कुमार श्रेष्ठले बताए ।
