रामेछाप- रामेछापको मन्थली नगरपालिका वडा नं २ को निलकण्ठेश्वर मावि पुर्व विद्यार्थी समाजले निवृत्तिभरण शिक्षकलाई सम्मान र विद्यार्थी पुरस्कृत गरेको छ । समाजले शुक्रबार बिद्यालयमा एक कार्यक्रमको आयोजना गरी उक्त विद्यालयमा विभिन्न समयमा अध्ययपन गराएका र हाल निवृत्तिभरण भएका शिक्षकलाई सम्मान सँगै हाल अध्ययनरत विद्यार्थीहरुलाई पुरस्कृत गरेको हो । सम्मानित हुने निवृत्तिभरण शिक्षकहरुमा क्रमशः गुन्जबहादुर श्रेष्ठ, रामचन्द्र अधिकारी, धनलाल श्रेष्ठ, मिन बहादुर तामाङ र विष्णुनाथ सुवेदी रहेको निलकण्ठेश्वर मावि पुर्व विद्यार्थी समाजका अध्यक्ष घननारायण श्रेष्ठ ‘घनश्याम’ श्रेष्ठले बताए ।
त्यस्तै शैक्षिक सत्र २०८१ मा कक्षा १ देखि कक्षा १२ सम्मका प्रथम, द्वितीय र तृतीय हुने विद्यार्थीलाई पुरस्कार समेत प्रदान गरिएको अध्यक्ष श्रेष्ठले बताए । उनिहरुलाई पुरस्कार स्वरुप शैक्षिक सामाग्री प्रदान गरिएको आयोजकले बताएको छ ।
त्यसैगरी सोही विद्यालयमा रामेछाप काठमाण्डौँ शृजनशिल समाज नेपालको आयोजनामा ‘स्थानीय उत्पादन र पर्यटनको प्रवर्द्धन गरौँ’ भन्ने शीर्षकमा वक्तित्वकला प्रतियोगिता पनि सम्पन्न भएको छ । प्रतियोगितामा प्रदिप रोका प्रथम, बिज्ञान श्रेष्ठ द्वितीय, एलिस अधिकारी तृतीय र जेनिसा अधिकारी सान्त्वना भएका छन । प्रतियोगितामा प्रथम, द्वितीय, तृतीय र सान्त्वना हुने छात्र/छात्रालाई क्रमशः तीन हजार, दुई हजार, एक हजार र पाँच सयका दरले पुरस्कृत गरिएको रामेछाप काठमाण्डौँ शृजनशिल समाज नेपालको अध्यक्ष डा. कृष्णहरि बुढाथोकीले बताए ।
निलकण्ठेश्वर मावि पुर्व विद्यार्थी समाजका अध्यक्ष घननारायण श्रेष्ठ ‘घनश्याम’ को अध्यक्षता तथा मन्थली नगरपालिकाका नगर प्रमुख लव श्रेष्ठको प्रमुख आतिथ्यतामा भएको कार्यक्रममा मन्थली नगरपालिका वडा नं २ का वडाध्यक्ष सुरेन्द्र कार्की, काठमाण्डौँ शृजनशिल समाज नेपालको अध्यक्ष डा. कृष्णहरि बुढाथोकी, सम्मानित हुने निवृत्तिभरण शिक्षक गुन्जन बहादुर श्रेष्ठ, डा. सुमन कर्माचार्य लगायतले आ-आफ्नो धारणा राखेका थिए ।
