रामेछाप- चालु आर्थिक वर्षको नौ महिनाको अवधिमा रामेछाप जिल्लाबाट ६ हजारभन्दा बढी युवा वैदेशिक रोजगारीका लागि बाहिरीएका छन् । चालु आर्थिक वर्षको साउनदेखि चैत्र मसान्तसम्मको तथ्यांकअनुसार ६ हजार ७६ जनाले विभिन्न मुलुकमा श्रम स्वीकृति लिएर विदेशिएको सुरक्षित आप्रवासन कार्यक्रम (SaMi) का जिल्ला संयोजक दीपक केसीले बताए ।
वैदेशिक रोजगारमा जानेहरूमध्ये ४ हजार ७ सय २० जना पुरुष र १ हजार ३ सय ५६ जना महिला रहेका छन् । अघिल्लो आर्थिक वर्षको तुलनामा यो वर्षको पहिलो ९ महिनामै उल्लेख्य संख्यामा युवाहरू विदेशिएको देखिन्छ । आर्थिक वर्ष २०८०।८१ मा रामेछापका ७ हजार ४ सय ३१ जनाले श्रम स्वीकृति लिएका थिए ।
६ वर्षमा ३१ जनाको मृत्यु, १५ जना अंगभंग
पत्रकारहरूसँग आयोजित अन्तरक्रिया कार्यक्रममा कार्यक्रम संयोजक केसीले वैदेशिक रोजगारसँग सम्बन्धित जोखिमपूर्ण पक्ष पनि सार्वजनिक गरे । उनका अनुसार विगत ६ वर्षको अवधिमा वैदेशिक रोजगारीमा गएका रामेछापका ३१ जनाले ज्यान गुमाएका छन् भने १५ जना अंगभंग भएका छन् ।
“यो संख्या अझ बढी हुन सक्ने अनुमान छ,” केसीले भने, “तर हामीसँग वैदेशिक रोजगार विभाग र आप्रवासी स्रोत केन्द्रमार्फत प्राप्त आधिकारिक तथ्यांक मात्र रहेको हो।”
३ हजार ६ सय बढीलाई परामर्श
जिल्ला प्रशासन कार्यालयमा राहदानी बनाउन आउने ३ हजार ६ सय ३३ जनालाई आप्रवासी स्रोत केन्द्रमार्फत वैदेशिक रोजगारसम्बन्धी परामर्श दिइएको कार्यक्रम संयोजकले जानकारी गराए । परामर्शदाताहरूले श्रमिकलाई रोजगारीका गन्तव्य, कामका प्रकृति, कानुनी प्रक्रिया, श्रमिकको हक-अधिकार र सम्भावित जोखिमबारे जानकारी दिने गरिएको छ ।
अन्तरक्रिया कार्यक्रममा मन्थली नगरपालिकाकी उपप्रमुख ईश्वरी बस्नेत, प्रमुख जिल्ला अधिकारी श्यामकृष्ण थापा, हेल्भेटास नेपालका कार्यक्रम अधिकृत उमा पौडेल, नेपाल पत्रकार महासंघ रामेछापका अध्यक्ष दीपक कुमार घिमिरे लगायतले वैदेशिक रोजगारीको पछिल्लो प्रवृत्ति, यसका चुनौती र समाधानका उपायबारे धारणा राखे । उनीहरूले विशेषगरी वैदेशिक रोजगारमा जानेको पूर्व तयारी, श्रमिकका लागि सुरक्षित गन्तव्यको पहिचान, सूचनाको अभाव र एजेन्टको प्रभावका विषयमा आ-आफ्नो भनाई राखेका थिए ।
