रामेछाप- नेपाली काँग्रेसका केन्द्रीय सदस्य अजयबाबु सिवकोटीले सरकार संचारमन्त्रीले नै प्रेस तथा अभिव्यक्ति स्वतन्त्रताको बर्खिलाप हुने गरी अभिव्यक्तिहरू दिइरहेको आरोप लगाएका छन् । नेपाल प्रेस युनियन रामेछापको ९औँ साधारण सभा आफ्नो भनाई राख्दै केन्द्रीय सदस्य सिवकोटीले संचारमन्त्रीले सामाजिक संजाललाई प्रतिबन्ध लगाउने सार्वजनिक भनाइहरू मार्फत प्रेस तथा स्वतन्त्रताको समेत बर्खिलाप हुने गरी अभिव्यक्ति दिइरहेको बताए ।
सोसल मिडियासँग कम्युनिस्ट बिचार बोक्नेहरू आत्तिइरहेको प्रसंग बताउँदै सिवकोटीले भने,“अहिले हामी स्वयम गठबन्धन सरकारमा छौँ । सञ्चार मन्त्री एमालेको छन् तर, उनको अभिव्यक्ति यसो हेर्ने हो भने प्रेस तथा अभिव्यक्ति स्वतन्त्रताको कहीँ न कहीँ बर्खिलाप हुने गरी अभिव्यक्ति दिइरहेका छन् । कहिले सोसल मिडियालाई प्रतिबन्ध लगाउने कुरा गरिरहेका हुन्छन् तर सारमा भन्ने हो भने सोसल मिडियाको मार्फत उनी सम्भवतः प्रेस तथा अभिव्यक्ति स्वतन्त्रतालाई कहीँ न कहीँ अलिकति भए पनि सङ्कुचित गराउन चाहन्छन भन्ने उनको अभिव्यक्तिले बताउँछ । यसरी प्रस्तुत गरिने अभिव्यक्तिकै कारण व्यवस्था माथि नै प्रश्न उठीरहेका छन् ।”
नेपाल प्रेस युनियनको निवर्तमान केन्द्रीय महासचिव समेत रहेका सिवकोटीले सरकारका प्रवक्ताले नै दिने यस्ता अभिव्यक्ति र गर्ने कार्यशैलीका कारण देशमा अर्को आन्दोलन हुन सक्ने तर्क प्रस्तुत गर्दै यस्ता अभिव्यक्तिलाई तत्काल सच्याउन समेत सरकारसँग माग गरे ।
त्यस्तै उनले सामाजिक सञ्जालमा आएका कुराले मानिसलाई दिग्भ्रमित बनाउने काम गरिएको पनि बताए । ‘सामाजिक सञ्जालमा आएका सबै कुरा सत्य हुन् भन्ने कुरा नागरिकले पत्याइ रहेका छन्, सामाजिक सञ्जालमा आएको सबै कुरा सत्य होइन, यो कुरा नागरिकलाई बुझाउन आवश्यक छ, यो भ्रमबाट नागरिकलाई मुक्त बनाउनु पर्छ’, उनले भने ।
उनले पछिल्ला दिनहरूमा देशमा निराशाको व्यापार भइरहेको छ बताउँदै असन्तुष्टिको जगमा असन्तुष्टिलाई देखाएर व्यवस्था विरोधीहरू निराशाको व्यापार गर्न लागेको आरोप लगाए । अहिले नागरिकमा आशा जगाउन राजनीतिक दल बिचको सम्बन्धलाई, पत्रकार र राजनीतिक दल बिचको सम्बन्धलाई अझ बलियो बनाउनु पर्नेमा उनको जोड रहेको छ ।
नेपाल प्रेस युनियन रामेछापका अध्यक्ष ज्ञानु श्रेष्ठको अध्यक्षतामा सदरमुकाम मन्थलीमा शानिवार भएको कार्यक्रममा नेपाली नेपाल प्रेस युनियनका केन्द्रीय महासचिव दिलिप पौडेल, नेपाली काँग्रेस रामेछापका पूर्व पार्टी सभापति रामचन्द्र खड्का लगायतका नेताहरूले नेपाल प्रेस युनियन रामेछापको ९औँ साधारण सभा सफलताको शुभकामना दिएका थिए ।
कार्यक्रममा नेपाल प्रेस युनियन रामेछापले प्रकाशन गरेको भित्ते पात्रो समेत सार्वजनिक गरिएको थियो ।
