चैत्र ५ गते देशभर स्वतन्त्र विद्यार्थी युनियन (स्ववियु) निर्वाचन हुँदैछ । रामेछापको सदरमुकाम मन्थलीस्थित मन्थली सहिद स्मृति बहुमुखी क्याम्पसमा पनि सोही दिन निर्वाचन हुनेछ । उक्त क्याम्पसमा तीन फरक विद्यार्थी संगठनहरू छुट्टाछुट्टै समूह बनाएर चुनावी मैदानमा उत्रिएका छन् । नेपाल विद्यार्थी संघ (नेविसंघ) का तर्फबाट अध्यक्ष पदका उम्मेदवार विपुल रोकासँग उनको नेतृत्वमा रहेको प्यानलले विद्यार्थीका लागि के-के योजना अघि सारेको छ ? उनीहरूको प्रमुख प्रतिबद्धता के-के हुन् ? यिनै विषयमा केन्द्रित रहेर हाम्रो प्रहार डटकमका प्रधान सम्पादक रामचन्द्र विकले गर्नु भएको कुराकानीको सम्पादित अंश प्रस्तुत छ ।
स्ववियु निर्वाचन २०८१ को प्रतिस्पर्धा कस्तो देख्नुभएको छ? तपाईंको प्यानलले किन जित्नु पर्ने ?
स्ववियु निर्वाचन २०८१ प्रतिस्पर्धात्मक र रोचक रहेको छ । विद्यार्थीहरुले कसरी सक्षम नेतृत्व छान्ने भन्ने निर्णय गर्नुपरेको छ । हाम्रो प्यानलले शैक्षिक सुधार, विद्यार्थी हकहित र क्याम्पसको समग्र विकासका लागि ठोस योजना प्रस्तुत गरेका छौं । यसका लागि हाम्रो नेतृत्व आवश्यक छ ।
तपाईंको प्यानलले जारी गरेको प्रतिबद्धता पत्रमा मुख्य प्राथमिकताका क्षेत्रहरु के-के छन् ?
हाम्रो प्रतिबद्धता पत्रमा विद्यार्थीहरुको शैक्षिक, भौतिक, तथा प्रविधिमैत्री सुविधा विस्तारलाई मुख्य प्राथमिकता दिइएको छ । प्रमुख प्रतिबद्धताहरुमा:
• INSU SCHOOL OF POLITICAL LEADERSHIP को स्थापना गरी विद्यार्थीहरुलाई संचारकला, राजनीतिक नेतृत्व, टिम बिल्डिङ, भावनात्मक बुद्धिमत्ता जस्ता सीप प्रदान गर्ने ।
• स्ववियु कप को स्थापना गरी खेलकुद प्रवर्द्धन गर्ने ।
• आर्थिक रूपमा कमजोर विद्यार्थीका लागि बाह्य श्रोत व्यवस्थापन गरी छात्रवृत्तिका लागि पहल गर्ने ।
• QAA (Quality Assurance and Accreditation) सुनिश्चिताका लागि विशेष पहल गर्ने ।
• विद्यार्थीहरुलाई अनलाइन कक्षा तथा लोकसेवा तयारी कक्षाको व्यवस्था मिलाउने ।
• क्याम्पस परिसरलाई स्वच्छ, सुन्दर बनाउन सरसफाई अभियान सञ्चालन गर्ने ।
• E-Library को स्थापना गरी विद्यार्थीहरुलाई सहज अध्ययनको वातावरण प्रदान गर्ने ।
विद्यार्थी समुदायलाई तपाईंको टिमले कसरी प्रतिनिधित्व गर्नेछ ?
हामी विद्यार्थी समुदायका वास्तविक माग र समस्याहरु उठान गर्दै उनीहरुको हकहितका लागि निरन्तर संघर्ष गर्नेछौं । हाम्रो टिमले नारा मात्र होइन, ठोस कार्ययोजना सहित अघि बढ्नेछ । सबै विद्यार्थीलाई समेट्ने, कुनै पनि विभेद नगर्ने, र उनीहरुको हितमा नीतिगत तथा व्यवहारिक सुधारका कार्यक्रम ल्याउनेछौं ।
तपाईंबाट विद्यार्थीले के अपेक्षा गर्न सक्छन् ?
विद्यार्थीहरुले हामीबाट पारदर्शी, निस्वार्थ र प्रभावकारी नेतृत्वको अपेक्षा गर्न सक्छन् । हामी सबै विद्यार्थी साथीहरुसँग सहकार्य गर्दै उनीहरुको भविष्य निर्माणका लागि आवश्यक वातावरण तयार पार्नेछौं ।
अन्त्यमा, मतदाताहरुलाई के सन्देश दिन चाहनुहुन्छ?
हामीले प्रस्तुत गरेका प्रतिबद्धताहरु केवल आश्वासन मात्र होइन, हामी विद्यार्थी हकहितका लागि अडिग भएर काम गर्नेछौं । तपाईंको अमूल्य मतले हाम्रो नेतृत्वलाई जित दिलाएर हाम्रो योजना कार्यान्वयन गर्ने अवसर दिनुहोस् । जय नेपाल !
