रामेछाप- ऊर्जा, जलश्रोत तथा सिँचाई राज्य मन्त्री पूर्णबहादुर तामाङ कान्छारामले जिल्लाको विकासलाई पहिलो प्राथमिकतामा राखेर काम गर्ने बताएका छन् । राज्यमन्त्री भएर पहिलो पटक गृह जिल्ला रामेछापमा आएका राज्य मन्त्री तामाङले नेपाली काँग्रेस रामेछापले शनिवार सदरमुकाम मन्थलीमा आयोजना गरेर बधाई ज्ञापन कार्यक्रममा बोल्दै जिल्लाका हरेक समस्यालाई पहिलो प्राथमिकतामा राखेर काम गर्ने बताएका हुन् ।
आफूले सम्हालेको मन्त्रालय प्रत्यक्ष नागरिकसँग जोडिएको मन्त्रालय भएको र उक्त मन्त्रालय मार्फत हुने काम र अन्य मन्त्रालयबाट हुने काममा रामेछाप जिल्लालाई पहिलो प्राथमिकतामा राखेर काम गर्ने उनले प्रतिबद्धता जनाए । राज्यमन्त्री तामाङले प्रतिबद्धता जनाउँदै भने,‘म एउटा पार्टीबाट चुनाव जितेको हुँ तर, चुनाव जितेपछि र अहिले राज्य मन्त्री भए पछि सबैको जनप्रतिनिधि छु । त्यसैले मेरो तर्फबाट जिल्लामा गर्ने विकासमा प्राथमिकतालाई पहिचान गरेर समान रूपमा गर्ने छु ।’
मन्त्री तामाङले जिल्लाको लागि आवश्यक पर्ने विकास माग गर्दा कुनै पार्टी विशेषलाई नभई समग्र जनताको पक्षमा हुने गरी माग गर्न अनुरोध गर्दै त्यसरी माग गरेको विकासबाट धेरै भन्दा धेरै नागरिकले फाइदा पुग्ने गरी योजना बनाउन अनुरोध गरे ।
आफू नेपाली काँग्रेसको एउटा क्रियाशील सदस्य हुँदा देखि नै समाज सेवा गर्न रुचाउने स्वभावको भएको स्मरण गर्दै राज्यमन्त्री तामाङले अहिले देशको संघीय सरकारको ऊर्जा, जलश्रोत तथा सिँचाई मन्त्रालयको जिम्मेवारी नै आफूसँग भएकाले जिल्लाको विकासको लागि सकेको काम गर्ने भनाइ राखे ।
देशको एउटा मन्त्रीले आफ्नो जिल्लाको आवश्यकतालाई मात्रै ध्यानमा राख्न नसक्ने धारणा व्यक्त गर्दै राज्य मन्त्री तामाङले रामेछाप जिल्लाको ऊर्जा, जलश्रोत र सिँचाइको क्षेत्रमा गर्न सकिने कामको योजना बनाएर मन्त्रालयमा ल्याउन अनुरोध गरे ।
घ्याप्चेको पहिरो नियन्त्रणको काम सुरु हुन्छ
राज्यमन्त्री तामाङले जिल्लाकै सबै भन्दा ठुलो पहिरोको रूपमा चिनिएको घ्याप्चेको पहिरोले सदरमुकाम मन्थलीलाई नै जोखिम पार्ने अवस्था रहेकाले पहिरो नियन्त्रणको लागि काम सुरु गर्ने बताएका छन् । राज्यमन्त्री तामाङले भने, ‘घ्याप्चेको पहिरोले बारीलाई बगर बनाएको ठाउँको बिच भाग छोडेर दुई तर्फ ३०÷३० मिटरको वाल घ्याप्चेको शिर देखि मन्थलीको पुल सम्म लगाउनु पर्छ । यसो गर्न सक्यौँ भने त्यहाँ बगरमा परिणत भएका हजारौँ रोपनी जग्गालाई उपयोग गर्न सक्छौँ । त्यहाँबाट जग्गा बारी हुने जग्गाधनीले राम्रो आम्दानी लिन सक्छन् । त्यसैले त्यो काम गर्न अति आवश्यक छ र मैले त्यो कामलाई अगाडि बढाउँछु । हामीले योजना गरे अनुसार काम गर्न सक्यौँ भने खोला पनि आफ्नो बाटो भएर बग्न पाउँछ अनि किसानले पनि आफ्नो जग्गामा खेती गरेर आम्दानी लिन सक्छन् । तर, त्यसको लागि घ्याप्चे पहिरोबाट प्रभावित स्थानीयले पनि राज्यले गर्ने रकममा केही खर्च चाहिँ गर्नु पर्छ ।’
नेपाली काँग्रेस रामेछापका पार्टी उपसभापति लेख बहादुर कार्कीको अध्यक्षतामा भएको शुभकामना तथा बधाई ज्ञापन कार्यक्रममा नेपाली काँग्रेसका नेता तथा कर्यकर्ताहरुले पार्टी कार्यालयमा पुगेर राज्यमन्त्री तामाङलाई बधाईसँगै सफलताको शुभकामना दिएका थिए ।
आफ्नो प्रतिकृया दिनुहोस्