रामेछाप- नेकपा एमाले रामेछापको ८ ओटै स्थानीय तहको अधिवेशन सम्पन्न भएको छ । केही स्थानीय तहमा निर्वाचन र धेरै जसो स्थानीय तहमा सर्वसम्मत रूपमा सम्पन्न भएको अधिवेशनले पालिका हाँक्ने नयाँ कमिटी चयन गरेको छ ।
मन्थली नगरको अध्यक्षमा पुनः रामबाबु घिमिरे
मन्थली नगरपालिकामा रामबाबु घिमिरेको अध्यक्षता हाल ६९ सदस्यीय नगर कमिटी बनेको छ । मन्थली नगर कमिटीको सचिवमा गणेश कार्की, उपसचिवमा रमेश गेस्माली मगर र जानुका कुमारी गिरी निर्वाचित भएका छन् । मन्थली नगर कमिटीको दोस्रो अधिवेशनबाट निर्वाचित पदाधिकारी र सदस्यहरू सबै सर्वसम्मत रूपमा निर्वाचित भएका हुन् । अध्यक्षमा निर्वाचित घिमिरे यस अघि पनि नगर अध्यक्ष नै रहेका थिए ।
रामेछाप नगरको अध्यक्षमा पुनः रोशन पाख्रिन
नेकपा एमाले रामेछाप नगरपालिकाको दोस्रो अधिवेशनबाट नगर कमिटीको अध्यक्षमा पुनः रोशन पाख्रिन नै दोहोरिएका छन् । पाख्रिनको अध्यक्षमा बनेको नगर कमिटीको उपाध्यक्षमा श्याम कुमार श्रेष्ठ, सचिवमा माधव ढकाल, उपसचिवमा विनोद कार्की र जयन्ती उदास निर्वाचित भएका छन् । नगर कमिटीको अध्यक्ष, पदाधिकारी र सिंगो नगर कमिटीको टिम नै सर्वसम्मत रूपमा निर्वाचित भएको हो ।
लिखुतामाकोशी गाउँपालिका अध्यक्षमा केशर बहादुर पौडेल निर्वाचित
नेकपा एमाले लिखुतामाकोशी गाउँपालिकाको अध्यक्षमा केशर बहादुर पौडेल (केबि) निर्वाचित छन् । एमाले लिखुतामाकोशी गाउँपालिका कमिटीको दोस्रो अधिवेशन अन्तरगत भएको निर्वाचनबाट पौडेल अध्यक्षमा निर्वाचित भएका हुन । गाउँ कमिटीको उपाध्यक्षमा सोमबहादुर तामाङ, सचिवमा निङ्ममर तामाङ, उप–सचिवमा विनोद खड्का र सुमित्रा राई सुनुवार निर्वाचित भएका हुन् । पौडेल अध्यक्षका अर्का उम्मेदवार सुवास बोहरालाई पराजित गर्दै मतदान प्रक्रियाबाट अध्यक्षमा निर्वाचित भएका हुन् ।
दोरम्बा शैलुङको अध्यक्षमा देउबहादुर थापामगर
नेकपा एमाले दोरम्बा शैलुङ गाउँपालिका कमिटीको अध्यक्षमा देउबहादुर थापामगर निर्वाचित भएका छन् । दोस्रो गाउँपालिका कमिटीको अधिवेशनले थापामगरको नेतृत्वमा दोरम्बा शैलुङ गाउँपालिका कमिटी चयन गरेको हो । अधिवेशनले गाउँ पालिका कमिटीको उपाध्यक्षमा टङ्क सापकोटा, सचिवमा नारायण श्रेष्ठ, उप–सचिवमा कर्णबहादुर तामाङ र गङ्गा श्रेष्ठलाई निर्वाचित गराएको छ ।
सुनापतिमा रोज बहादुर ग्यापक अध्यक्षतामा नयाँ समिति
नेकपा एमाले सुनापति गाउँपालिका कमिटीको अध्यक्षमा रोज बहादुर ग्यापक निर्वाचित भएका छन् । सुनापति गाउँपालिका कमिटीको दोस्रो अधिवेशनले ग्यापकको नेतृत्वमा नयाँ सुनापति गाउँपालिका कमिटी चयन गरेको हो । अधिवेशनले गाउँ पालिका कमिटीको उपाध्यक्षमा अमिर लामा, सचिवमा केशर मान लामा, उप–सचिवमा मिलन के.सी र कमला लामालाई निर्वाचित गरेको छ ।
गोकुलगंगामा सचिन कार्कीको अध्यक्षतामा नयाँ कमिटी
नेकपा एमाले गोकुलगंगा गाउँपालिका कमिटीको दोस्रो अधिवेशनबाट अध्यक्षमा सचिन कार्की निर्वाचित भएका छन् । गाउँपालिका कमिटीको उपाध्यक्षमा केशव कार्की, सचिवमा पर्शुराम कार्की, उपसचिवमा सुमन तामाङ र देवीमाया थापा सुनुवार निर्वाचित भएका छन् । दोस्रो गोकुलगंगा गाउँपालिका कमिटीको अधिवेशनले कार्कीको नेतृत्वमा ४६ सदस्यीय नयाँ कमिटी निर्वाचित गरेको हो । निर्वाचित सबै सर्वसम्मत रूपमा चयन भएका हुन् ।
उमाकुण्डको अध्यक्षमा नवराज खत्री निर्वाचित
नेकपा एमाले रामेछापको उमाकुण्ड गाउँपालिकामा नयाँ नेतृत्व चयन भएको छ । गाउँपालिका कमिटीको दोस्रो अधिवेशनले नवराज खत्री (मिलन) को नेतृत्वमा नयाँ समिति चयन भएको हो । उनी मतदान प्रक्रियाबाटै निर्वाचित भएका हुन् । खत्रीले अध्यक्षका अर्का उम्मेदवार रमेशबहादुर बस्नेतलाई पराजित गर्दै अध्यक्षमा निर्वाचित भएका हुन् । अन्य पदाधिकारी र सदस्य भने सर्वसम्मत भएका छन् । उपाध्यक्षमा पूर्णप्रसाद गुरागाईँ, सचिवमा पवित्र कार्की र उपसचिवमा बालकृष्ण घिमिरे निर्वाचित भएका छन् ।
खाँडादेवीमा मोतीलाल तामाङको अध्यक्षतामा नयाँ समिति
नेकपा एमाले खाँडादेवी गाउँपालिका कमिटीको अध्यक्षमा मोतीलाल तामाङ निर्वाचित भएका छन् । खाँडादेवी गाउँपालिका कमिटीको दोस्रो अधिवेशनले तामाङको नेतृत्वमा खाँडादेवी गाउँपालिका कमिटी चयन गरेको हो । अधिवेशनले गाउँ पालिका कमिटीको उपाध्यक्षमा जंगलाल तामाङ, सचिवमा रमेश केसी, उप–सचिवमा मनिस श्रेष्ठ र निर्मला चालिसे (पौडेल) लाई निर्वाचित गरेको छ ।
जिल्ला अधिवेशन, वडा अधिवेशन हुँदै जिल्लाका ८ ओटै स्थानीय तहको अधिवेशन सम्पन्न भएसँगै नेकपा एमाले रामेछापको संघीय संरचना अनुसार सबै अधिवेशनहरू सकिएको नेकपा एमाले रामेछापका उपाध्यक्ष होतराज ढकालले जानकारी दिए । जिल्ला, वडा र पालिका तहको अधिवेशनहरू तोकिएकै मितिमा सम्पन्न भएर सबै संरचनामा नयाँ नेतृत्व आइसकेको उपाध्यक्ष ढकालले बताए ।
नेकपा एमालेको विधान अनुसार जिल्ला, वडा र पालिकाका कमिटीहरुको कार्यकाल ३ वर्षको हुने छ ।
