रामेछाप- रामेछापको सुनापति गाउँपालिकाले सुनापति गाउँपालिकाका आम नागरिक, पालिका भित्र कार्यरत सरकारी कर्मचारी र गाउँपालिका भित्रै कार्यक्षेत्र रही कार्यरत वित्तीय संस्थाका कर्मचारीलाई निःशुल्क रगत उपलब्ध गराउने भएको छ । सुनापति गाउँपालिकाले नेपाल रेडक्रस सोसाइटी जिल्ला शाखा रामेछापसँगको सहकार्यमा रामेछाप, काभ्रेपलान्चोक, काठमाडौँ, भक्तपुर र ललितपुरका स्वास्थ्य संस्थाहरूमा उपचार गराउँदा सुनापति गाउँपालिकाका स्थानीय, पालिका भित्र कार्यरत सरकारी कर्मचारी र पालिका भित्र नै कार्यरत वित्तीय संस्थाका कर्मचारीलाई रगत आवश्यक परेमा निःशुल्क उपलब्ध गराउने भएको हो ।
अस्पतालहरूमा उपचार गराउन जाँदा धेरै जसो नागरिकहरूले भनेकै समयमा रगत नभेट्ने, कतिपयसँग रगत किन्ने पैसा समेत नहुने जस्ता समस्याहरू नागरिकले भोग्दै आएको कुरालाई मध्यनजर गरेर सुनापतिबासीले यस्तो समस्या भोग्नु नपरोस भनेर निःशुल्क रगत दिने व्यवस्था मिलाइएको सुनपाति गाउँपालिकाको उपाध्यक्ष गीता विष्ट चौलागाईंले बताइन् । उपाध्यक्ष चौलागाईंका अनुसार चालु आर्थिक वर्षबाट सुरु गरिएको यो कार्यक्रमबाट सुविधा लिने सेवाग्राही अर्थात् रगत चाहिने बिरामीले चिकित्सकको उपचार कागजात र आफ्नो परिचय खुल्ने कागजातहरू नागरिकता, राष्ट्रिय परिचय पत्र, कर्मचारी परिचय पत्र आदि लिएर जानु पर्ने छ ।
चालु आर्थिक वर्षको लागि सुरु भएको कार्यक्रममा नेपाल रेडक्रस सोसाइटी जिल्ला शाखा रामेछापले काठण्माडौ, काभ्रेपलान्चोक, भक्तपुर र ललितपुरका रेडक्रस शाखाहरूसँग समन्वय गरेर निःशुल्क रगत उपलब्ध गराउने व्यवस्था मिलाइएको नेपाल रेडक्रस सोसाइटी जिल्ला शाखा रामेछापका मन्त्री दुर्गा बहादुर श्रेष्ठले बताए ।
सुनापति गाउँपालिकाले पालिकावासीलाई पालिकाबाट संचालन गरिएको निःशुल्क रगत उपलब्ध गराउने कार्यक्रमबाट सुविधा लिन भन्दै शुक्रवार एक सूचना समेत जारी गरेको छ ।
नेपाल रेडक्रस सोसाइटी जिल्ला शाखा रामेछापसँगको सहकार्यमा खाँडादेवी गाउँपालिका, गोकुलगंगा गाउँपालिका र लिखुतामाकोशी गाउँपालिकाले पनि आफ्नो पालिकावासीलाई रगत आवश्यक परेमा निःशुल्क उपलब्ध गराउने गरी कार्यक्रम संचालन गरिरहेका छन् ।
