काठमाण्डौ- नेपाली काँग्रेस रामेछापका पार्टी सचिव दीपक खड्काले आफ्नै पार्टीका उम्मेद्वार हराउन बन्ने गुटको अन्त्य हुनु पर्ने बताएका छन् । शनिबार गिरिजा प्रसाद कोइराला फाउण्डेशन रामेछापले काठमाण्डौमा आयोजना गरेको नयाँ वर्षको शुभकामना आदन प्रदान तथा चियापान कार्यक्रममा आफ्नो भनाई राख्ने क्रममा सचिव खड्काले नेपाली काँग्रेस पार्टी भित्र आफूलाई मन नपरेको मान्छेले टिकट लिएमा हराउन नेताहरु गुट नै बनाएर लाग्ने गरेको आरोप लगाउँदै त्यसको अन्त्य गर्न आवश्यक रहेको बताएका हुन् ।
पार्टी सचिव खड्काले लोकतान्त्रिक पार्टीमा गुट उपगुट बन्नु स्वभाविक भएको भएता पनि त्यो गुटले काँग्रेसबाट टिकट लिएर अर्को पार्टीको उम्मेद्वारसँग प्रतिस्पर्धामा रहेका आफ्नो पार्टीको उम्मेद्वारलाई हराउनेमा नभएर जिताउनेमा सबै नेताहरु एक भएर लाग्नु पर्ने धारणा राखे ।
मन नपरेका मान्छेलाई हराउन बनेको गुटलाई नेताहरुले सक्रिय राखे त्यसले पार्टीलाई घाटा लाग्ने बताउँदै सचिव खड्काले पार्टी भित्र बनेका गुट पार्टी भित्रको अधिवेशनमा मात्रै प्रयोग गरिनु पर्ने धारणा राखे । उनले अहिले नेपाली काँग्रेस भित्रका अधिकाशं नेता तथा कार्यकर्ताहरु आफ्नै पार्टीका नेताहरुको आलोचना गर्नेमा बढी केन्द्रित भएको आरोप लगाउँदै काँग्रेस पार्टीको त्यो विशेषता नभएकाले आफ्नो कमजोरीलाई त्याग्न जरुरी रहेको पनि बताए ।
गिरिजा प्रसाद कोइराला फाउण्डेशन रामेछापका अध्यक्ष समेत रहेका खड्काले स्वर्गीय गिरिजा प्रसाद कोइरालाले शान्ति, लोकतन्त्र र समृद्धिको नारा लिएर अगाडि बढेको स्मरण गर्दै फाउण्डेशनले त्यही नारालाई आत्मासात गर्दै समाजमा त्यही सन्देश स्थापित गरेर मुलुकमा आएको शान्ति, लोकतन्त्र र समृद्धिलाई संस्थागत गर्न पनि फाउण्डेशनले काम गरीरहेको बताए ।
गिरिजा प्रसाद कोइराला फाउण्डेशन रामेछापका अध्यक्ष दीपक खड्काको अध्यक्षता तथा नेपाली काँग्रेसका केन्द्रीय सदस्य मधु आचार्यको प्रमुख आतिथ्यतामा भएको कार्यक्रममा नेपाली काँग्रेस रामेछापका पुर्व पार्टी सभापति रामचन्द्र खड्का, नेकपा माओवादी केन्द्रका केन्द्रीय सदस्य एवं पुर्वगृह राज्यमन्त्री श्याम कुमार श्रेष्ठ (कुशल) लगायत नेपाली काँग्रेस रामेछापका नेता, गिरिजा प्रसाद कोइराला फाउण्डेशन रामेछापका पदाधिकारी र सदस्यहरुको सहभागिता रहेको थियो ।
