रामेछाप– रामेछापका प्रमुख जिल्ला अधिकारीले फरक क्षमता भएका व्यक्ति र जेष्ठ नागरिकको घरमै पुगेर नागरिता दिइएकी छिन् । प्रमुख जिल्ला अधिकारी अनिता निरौलाले शनिबार जिल्लाको रामेछाप नगरपालिका वडा नं ४ हिमगंगाका फरक क्षमता भएका २५ वर्षका व्यक्ति र ७२ वर्षीय जेष्ठ नागरिकको घरमै पुगेर नागरिता दिइएकी हुन् ।
नागरिकता बनाउनको लागि जिल्ला प्रशासन सम्म आउन नसक्ने फरक क्षमता भएका २५ वर्षीय नरबहादुर माझी र ७२ वर्षीय जेष्ठ नागरिक भक्तमाया सुनुवारको घरमै पुगेर नागरिकता दिइएको प्रमुख जिल्ला अधिकारी अनिता निरौलाले बताइन् । यातायातको सहज पहुँच नहुदा उनीहरुलाई जिल्ला प्रशासन कार्यालयसम्म ल्याउन सम्भव नभएकाले शनिबारको दिन पारी घरमै पुगेर नागरिकता प्रदान गरिएको प्रजिअ निरौलाले बताइन् । अशक्त तथा अपाङ्गता भएका व्यक्तिहरुलाई सहज सेवा प्रदान गर्नु राज्यको दायित्व भएकाले फरक क्षमता भएका व्यक्ति र जेष्ठ नागरिकलाई घरमै पुगेर नागरिकता प्रदान गरिएको प्रजिअ निरौलाको भनाई रहेको छ । जिल्लाका अन्य पालिका तथा वडाहरुमा अशक्त तथा आपाङ्गता भएका व्यक्ति भए घरमै गएर सेवा प्रदान गर्ने बताउँदै त्यस्ता व्यक्ति बारे जानकारी दिन पनि अनुरोध गरिन् ।
प्रमुख जिल्ला अधिकारी सहित जिल्ला प्रशासन कार्यालयको टोली घरमै पुगेर नागरिकता प्रदान गरिदिएपछि ७२ वर्षीय भक्तमाया सुनुवारकी बहिनी मैया सुनुवारले प्रजिअको टोलीलाई धन्यबाद दिँदै एउटा सामान्य नागरिकको समस्यालाई बुझेर घरमै आएर नागरिकता दिँदा आफूहरु धेरै खुसी भएको बताइन् ।
लामो समयको प्रयासपछि फरक क्षमता भएका नगरबहादुर माझी र ७२ वर्षीय जेष्ठ नागरिक भक्तमाया सुनुवारलाई नागरिकता दिलाउन सफल भएको रामेछाप नगरपालिकाका उपप्रमुख बालकुमारी कार्कीले बताइन् । नागरिकता प्राप्त गरेका माझी र सुनुवारलाई सामाजिक सुरक्षा भत्ता दिलाउन तत्कालै प्रक्रिया अघि बढाउने पनि कार्कीले बताइन् । यस्ता व्यक्तिहरुलाई नागरिकता दिलाउनको लागि नगरपालिकाले जिल्ला प्रशासन कार्यालयमा समन्वय गरीरहेको पनि उपप्रमुख कार्कीले बताइन् ।
आफ्नो प्रतिकृया दिनुहोस्