रामेछाप- नेपाल विद्यार्थी संघ रामेछापले मन्थली माध्यमिक विद्यालयमा अध्ययनरत विद्यार्थीहरुलाई न्यानो कपडा वितरण गरेको छ । मंगलबार एक कार्यक्रमको आयोजना गरी नेविसंघ रामेछापले विद्यालयमा अध्ययनरत तीन सय विद्यार्थीहरुलाई जाडोमा लगाउने न्यानो कपडा वितरण गरेको हो ।
कमजोर आर्थिक अवस्था भएका विद्यार्थीहरुलाई सहयोग पुर्याउने उद्देश्यले जाडोको समयमा न्यानो कपडा वितरण गरिएको नेविसंघ रामेछापका अध्यक्ष विनोद बुढाथोकीले बताए । विद्यालय व्यवस्थापन समिति र विद्यालय प्रशासनको आग्रहमा नै न्यानो कपडा वितरण गरिएको उनको भनाई छ । मन्थली माविमा मात्रै नभइ जिल्लाभरीका विद्यार्थीलाई जस्तोसुकै अफ्टेरो परेमा पनि नेविसंघले सहयोग गर्ने बताउँदै अध्यक्ष बुढाथोकीले नेविसंघ रामेछापको सम्पर्कमा आउन अनुरोध गरे ।
कार्यक्रमका प्रमुख अतिथि समेत रहेका प्रतिनिधि सभाका सदस्य पूर्णबहादुर तामाङ (कान्छाराम) ले देशलाई पूर्ण रुपमा सवल बनाउने थलो विद्यालय भएकाले शिक्षकहरुले पठनपाठनलाई राम्रो बनाउन जरुरी रहेको बताए । उनले रामेछापको शैक्षिक क्षेत्रको गुणस्तरीय विकासको लागि आफू प्रतिवद्ध भएर लाग्ने धारणा राखे । उनले मन्थली माविको भौतिक संरचना निर्माण देखि शैक्षिण गुणस्तरको आगि आवश्यक सहयोग गर्ने प्रतिवद्धता समेत जनाएका छन् ।
त्यस्तै कार्यक्रमका विशेष अतिथि एवं जिल्ला समन्वय समिति रामेछापका प्रमुख चिना खड्का कार्कीले भविष्यको कर्णधार उत्पादन हुने विद्यालय जस्तो पवित्र भूमिमा सबैले सहयोग गर्नु पर्नेमा जोड दिंदै विद्यालयलाई आवश्यक पर्ने सहयोग जुडाउन आफू लाग्ने प्रतिवद्धता जनाइन् ।
जाडोको समयमा नेविसंघ रामेछापले सहयोगी भावनाका साथ विद्यार्थीहरुलाई उपलब्ध गराएको न्यानो कपडाले कमजोर आर्थिक अवस्था भएका विद्यार्थीहरुलाई राहात मिलेको मन्थली माध्यमिक विद्यालय व्यवस्थापन समितिका अध्यक्ष तेज प्रसाद सुवेदी (श्याम) ले बताए । उनले मन्थली माविमा पढ्ने धेरै जसो बालबालिकाहरु कमजोर आर्थिक अवस्था भएका परिवारका भएको बताउँदै उनिहरुको सहयोगका लागि आफूहरुकै अग्रसरतामा यस्ता सहयोगी हातहरु खोज्दै हिँडेको धारणा राखे ।
नेविसंघ रामेछापका अध्यक्ष विनोद बुढाथोकीको अध्यक्षमा भएको कार्यक्रममा नेपाल पत्रकार महासंघ रामेछापका अध्यक्ष बद्री नयाँघरे, मन्थली माध्यमिक विद्यालयका प्रधानाध्यपक टंक प्रसाद दाहाल लगायतले आ–आफ्नो भनाइ राखेका थिए ।
