रामेछाप- रामेछाप जेसिजले नवनिर्वाचित जनप्रतिनिधिसँग अन्तर संम्वाद कार्यक्रमको आयोजना गरेको छ । २०७९ को स्थानीय तहको निर्वाचनबाट निर्वाचित रामेछापका जनप्रितिनिधिहरुसँग शनिवार सदरमुकाम मन्थलीमा बिभिन्न विषयमा अन्तर संम्वाद कार्यक्रमको आयोजना गरेको हो ।
अन्तरसंम्वाद कार्यक्रममा नवनिर्वाचित जनप्रतिनिधिहरुलाई स्थानीय तह संचालनको लागि सहयोग पुर्याउने उदेश्यले स्थानीय सरकार संचालन ऐन, स्थानीय तहबाट हुने सेवा प्रवाह, स्थानीय तहमा सुशासन, बिषयगत समितिहरुको प्रभाबकारी भुमिका लगायतको विषयमा प्रशिक्षक बद्रीनाथ कोइरालाले जानकारी गराएका थिए । त्यस्तै आर्थिक सामाजिक बिकाश र योजना तथा बजेट बिचको सम्बन्ध, अन्तर स्थानीय तह तथा अन्तर सरकार समन्वय र सहकार्य, अनुगमन- मुल्यांकन स्थानीय तह सस्थागत क्षमता स्वमूल्याङ्कन, राजनैतिक प्रतिबद्धता कार्यन्वयन लगायतका विषयबस्तुमा प्रशिक्षक मीन बस्नेतले जानकारी गराएका थिए ।
रामेछाप जेसिजका अध्यक्ष रामहरि सापकोटाको अध्यक्षता तथा जिल्ला समन्वय समिति रामेछापका प्रमुख चिना खड्का कार्कीको प्रमुख आतिथ्यतामा भएको कार्यक्रममा नगरपालिकाका प्रमुख, गाउँपालिका अध्यक्ष, नगरपालिकाका उपप्रमुख, गाउँपालिका उपाध्यक्ष लगायतको सहभागिता रहेको थियो ।
