रामेछाप– रामेछाप नगरपालिका वडा नं ३ साँघुटारका नवनिर्वाचित जनप्रतिनिधिको पहिलो बैठकले वडा भरीका विद्युत ग्राकको विद्युत महशुल वडाले तिरिदिने निर्णय गरेको छ । सोमबार बसेको वडाको पहिलो बैठकले ५ एमपिएरको एम.सी.बी मार्फत न्यूनतम २० युनिट भन्दा कम विद्युत खपत गर्ने ग्राहकको विद्युत महशुल वडाले तिरिदिने निर्णय गरेको हो ।
नवनिर्वाचित वडाध्यक्ष दल बहादुर प्रधानले पहिलो बैठकको निर्णय सुनाउँदै भने– ‘निर्वाचित भएर आएपछिको पहिलो बैठक बसेर विभिन्न ९ निर्णय गर्दै पहिलो बैठक सकिएको छ । ९ निर्णय मध्ये ८ औं नम्बरको निर्णयमा हामीले साँघुटारवासीको आवश्यकतालाई महसुस गर्दै २० युनिट भन्दा कम विद्युत खपत गर्ने ग्राहकको विद्युत महशुल वडाले तिरिदिने गरी विद्युत महशुल मिनाह गरिदिने निर्णय गरेका छौँ । यसले कम आर्थिक अवस्था भएका साँघुटारवासीलाई थोरै भएपनि सहयोग पुग्ने छ ।’
यो निर्णयले ग्राहकहरुलाई आर्थिक रुपमा फाइदा पुग्नुका साथै विद्युत बचतमा समेत सहयोग पुग्ने विश्वास आफूहरुले लिएको वडाध्यक्ष प्रधानले बताए । पहिलो बैठकले गरेको निर्णयको कार्यन्वयन भने आउँदो आर्थिक वर्ष २०७९/०८० बाट हुने प्रधानले बताए । ५ एमपिएरको एम.सी.बी मार्फत न्यूनतम २० युनिट भन्दा कम विद्युत खपत गर्ने ग्राहकको विद्युत महशुल नेपाल विद्युत प्राधिकरणसँग समन्वय गरेर तिर्ने व्यवस्था मिलाइने पनि नवनिर्वाचित वडाध्यक्ष प्रधानले बताए । ५ एमपिएरको एम.सी.बी मार्फत विद्युत खपत गर्ने ग्राहकको संख्या एकिन गरेर मात्रै बजेटको व्यवस्था गरिने अध्यक्षले बताए ।
त्यस्तै साँघुटारमा लाग्दै आएको शनीबारे हाटबजारलाई व्यवस्थित गर्नको लागि डिपिआर तयार गरी अडाडि बढ्ने र डिपिआर तयार गर्नको लागि रामेछाप नगरलाई अनुरोध गर्ने निर्णय पनि बैठकले गरेको छ ।
