रामेछाप- नेपाली काँग्रेस जिल्ला कार्य समिति रामेछापले काँग्रेस नेता ताराराम श्रेष्ठको उपचारका लागि उठाइएको रकम हस्तान्तरण गरेको छ । नेपाली काँग्रेस रामेछापकोे खाँडादेवी गाउँपालिकाको सित्खामा सम्पन्न जिल्ला कार्य समितिको वैठकमा पार्टीका सदस्यहरुबाट उठेको १ लाख ६५ हजार ५ सय २५ रुपैयाँ सहयोग रकम पार्टी सभापति पुर्णबहादुर (कान्छाराम) तामाङ्गले ताराराम श्रेष्ठका आफन्तलाई हस्तान्तरण गरेका हुन् ।
उपचारको लागि रकम अभाव भएपछि रकम संकलनका लागि यस अगाडिको जिल्ला कार्य समितिको बैठकले पार्टीका जिल्ला सह–सचिव धु्रव चौंलागाइलाई जिम्मेवारी दिएको थियो ।
पार्टीले आफूलाई दिएको जिम्मेवारी अनुसार जिल्ला कार्य समितिका पदाधिकारी, जिल्ला कार्य समितिका सदस्यहरु, महाधिवेशन प्रतिनिधि र काँग्रेस नेताहरुबाट उठेको रकम दुवै मृगौला फेल भएर भारतमा उपचार गराइरहेका काँग्रेस नेता ताराराम श्रेष्ठका आफन्तलाई हस्तान्तरण गरिएको सह–सचिव ध्रुव चौंलागाईंले बताए । खाँडादेवी गाउँपालिका वडा नं ५ श्रेष्ठको उपचारका लागि उठेको रकम सोहि वडाका काँग्रेस इकाइ सभापति विराज श्रेष्ठ र सचिव विनोद मोक्तान मार्फत हस्तान्तरण गरिएको थियो ।
