रामेछाप– रामेछापको लिखुतामाकोशी गाउँपालिका वडा नं ६ खिम्ती जमुने स्थित सुजिता कुमारी बुढोथोकीको घरमा भरुवा बन्दुक देखाएर चोरी गर्ने चार जना व्यक्तिलाई प्रहरीले पक्राउ गरी सार्वजनिक गरेको छ । भदौ ३१ गते राती चार जनाको समूहमा आएर भरुवा बन्दुक सहित धारिलो हतियार देखाएर डरत्रासमा पारेर सुनका गहना, पैसा लगायतका सामग्री चोरी गर्ने चार जनालाई प्रहरीले विहिबार पक्राउ गरेर शुक्रबार पत्रकार सम्मेलन गरी सार्वजनिक गरेको हो ।
पक्राउ पर्नेहरुमा गोकुलगंगा गाउँपालिका वडा नं ६ फर्पु घर भएका ३३ वर्षका ठुला भन्ने मिलन तामाङ, २६ वर्षका राहुल भन्ने लाल बहादुर तामाङ, ३४ वर्षका जंगे भन्ने आकाश तामाङ र १८ वर्षका आशिष भन्ने भुमिराज तामाङ रहेका छन् । चोरीमा संलग्न मिलन तामाङलाई फर्पुबाट, लाल बहादुर तामाङलाई मन्थलीबाट, आकाश तामाङ र भुमिराज तामाङलाई काठमाण्डौबाट पक्राउ गरिएको जिल्ला प्रहरी कार्यालय रामेछापका प्रहरी प्रमुख प्रहरी नायव उपरिक्षक नवराज ढुंगानाले बताए ।
चोरीमा संलग्न व्यक्तिहरुलाई सार्वजनिक गर्दै प्रहरी प्रमुख ढुंगानाले भने– ‘मानिस सुतिरहेको बेला रातको समयमा भरुवा बन्दुक र धारिलो हतियार सहित आएर डरत्रास देखाएर लुटपाट गरेको भन्ने खबर आउन साथ हामीले विभिन्न माध्यमबाट खोजी कार्य जारी राख्यौँ । घटना भएको ७ दिनको दिन लुटपाटमा संलग्न व्यक्तिहरुलाई विभिन्न ठाउँबाट पक्राउ गर्न सफाल भयौँ । पक्राउ पश्चात अनुसन्धान गर्दै जाँदा चारै जनाले कसूर स्वीकार गरेपछि आज हामीले लुटपाटमा संलग्न व्यक्तिहरु सर्वाजनिक गर्न सफल भएका छौँ ।’
घटनामा संलग्न व्यक्तिहरुको साथबाट भरुवा बन्दुक एक थान, पुरानो मोरु नोट ८ थान, अन्य नोट ३५ थान, सुन जस्तो देखिने फुली २ थान र निज प्रतिवादीहरुले प्रयोग गरिरहेको चार थान मोबाइल बरामत गरिएको ढुंगानाले बताए ।
जहेरीमा उल्लेख भए अनुसार भदौ ३१ गते राती पीडितको घरबाट अन्दाजी १ तोला सुनको बेरुवा रिङ २ थान, नाकमा लगाउने ६ आना सुनकोफुली १ थान, पोते सहितको १२ आना सुनको घोप्टे– १ थान, दुई छोरीहरुले नाकमा लगाएको ४÷४ आना सुनको फुली २ थान, घरको कोठामा टिनको बाक्सामा राखेको ६ आना सुनको ढुंग्री २ थान, सोही बाक्सामा राखेको ३ माना जती चाँदीका पुराना सिक्काहरु, ६ आना सुनको कुण्डल २ थान, पोते सहितको १ तोल सुनको नौगेडी १ थान, पोते सहितको ६ आना सुनको तिलहरी १ थान, ६ आना सुनको औंठी १ थान, ४ तोला चाँदीको पाउजु २ थान, नगद पैसा रु.२५ देखि ३० हजार, आधा तोला सुनको तिलहरी १ थान, ८ आना सुनको माडवारी २ थान, ६ तोला चाँदीको कल्ली २ थान, केही पुरानाँ चाँदिका सिक्काहरु र एक थान शंख लगायतका सामग्री चोरी भएको छ ।
जाहेरीवालाले लाखौको सामग्री चोरी भएको बताएपनि चोरीमा संलग्नको साथबाट थोरै सामग्री बरामद भएकाले थप सामाग्रीहरु कहाँ रहेको भन्ने विषयमा थप अनुसन्धान भइरहेको प्रहरी प्रमुख नवराज ढुंगानाले बताएका छन् ।
घटना र घटनामा संलग्न व्यक्तिहरुको बारेमा थप अनुसन्धानको लागि जिल्ला अदालत रामेछापबाट शुक्रबार नै ७ दिनको लागि म्याद थप गरेर अनुसन्धान कार्य अगाडि बढाइएको प्रनाउ ढुंगानाले बताए ।
टाउको र मुखमा रुमाल बाँधेर आएका चार जनाले पीडित सुनिता कुमारी र उनकी दुई छोरीलाई समेत बन्दुकको कुन्दाले प्रहार गरी डरत्रास देखाएर करिव दुई घण्टाको अवधिमा घरको विभिन्न ठाउँमा भएका सामग्रीहरु चोरेर लगेका थिए ।
रामेछापमा तीन महिनादेखि विभिन्न ठाउँमा एकै प्रकृतिका श्रृंखलाबद्ध रुपमा चोरीका घटनाहरु भइरहेका छन् ।
