रामेछाप- रामेछाप नगरपालिका वडा नम्बर ४ हिमगंगाले वडामा विद्युत मिटर खरिद तथा जडानमा वडा कार्यालयले कुनै पनि पैसा नउठाएको बताएको छ । वडामा विद्युत विस्ताको लागि वडा कार्यालयले नेपाल विद्युत प्राधिकरणलाई सहयोग मात्रै गरेको र विद्युत मिटर जडानको लागि लाग्ने खर्च प्राधिकरणले नै उठाएकाले वडा कार्यालयले स्थानीय नागरिकसँग कुनै पनि शिर्षकमा पैसा नउठाएको वडाध्यक्ष टुपेन्द्र तामाङले बताउनुभयो ।
उहाँले भन्नुभयो– ‘नगरलाई पूर्ण विद्युतीकरण गर्ने योजना अनुसार हामीले पनि प्राधिकरणलाई विभिन्न सयहोग गरेका हौँ, विद्युत मिटर खरिद र जडानको लागि लाग्ने पैसा प्राधिकरणले नै प्रति परिवार दुई हजार ६ सय ४६ रुपैयाँ ६० पैसाका दरले रसिद दिएर लिएको हो । सामाजिक संजालमा जनप्रतिनिधिलाई बिचौलीयको संज्ञा दिँदै विद्युत मिटर जडानको लागि नागरिकसँग लाग्ने भन्दा बढी पैसा लिएको भन्ने कुराहरु आएका छन् । यसमा कुनै सत्यता छैन् । वडा कार्यालयले कुनै नागरिकलाई बढी पैसा तिर्नु पनि भनेको छैन् ।’ उहाँले थप्नुभयो– ‘बरु पैसा तिर्न नसक्ने विपन्न आठ परिवारलाई नगर प्रमुखको व्यक्तिगत खर्चमा विद्युत खरिद गरेर उपलब्ध गराएका छौँ । हामी कसरी बिचौलीया भयौँ ?’
उता नेपाल विद्युत प्राधिकरण रामेछाप वितरण केन्द्रका प्रमुख विनोद अधिकारीले पनि विद्युत मिटर जडानमा ग्राहकहरुसँग बढी शुल्क नलिएको बताउनुभयो । उहाँले भन्नुभयो– ‘हामीले कुनै पनि ग्राहकसँग लाग्ने शुल्क भन्दा बढी पैसा लिएको छैन् । त्यहाँका ग्राहकले अहिले सम्म कुनै गुनासो गर्नु भएको छैन् । यदि त्यस्तो गुनासो आयो भने हामी कारबाही प्रक्रिया अगाडी बढाउँछौँ ।’
९ ओटा वडा भएको रामेछाप नगरपालिका गत विहिबार देखि पूर्ण रुपमा विद्युतीकरणमा परिणत भएको छ ।
आफ्नो प्रतिकृया दिनुहोस्