रामेछाप- रामेछापको लिखुतमाकोशी गाउँपालिकाका महिलाहरूले गाउँमै उत्पादित कोदोबाट बिस्कुट बनाउने सीप सिकेर आत्मनिर्भरतातर्फ कदम चालेका छन् । गाउँपालिकाको वडा नं. १ दुरागाउँका २५ जना महिलाहरूले १५ दिनसम्म सञ्चालन गरिएको सीपमूलक तालिममार्फत बिस्कुट बनाउने कला आर्जन गरेका हुन् ।
बागमती प्रदेश सरकारअन्तर्गत सामाजिक विकास मन्त्रालय र लिखुतमाकोशी गाउँपालिकाको साझेदारीमा सञ्चालित ‘गृहिणी महिला सशक्तिकरण कार्यक्रम’ अन्तर्गत तालिम सञ्चालन गरिएको थियो । तालिममा सहभागी महिलाहरूलाई मैनावती एग्रिकल्चर डेभलपमेन्ट प्रालिको प्राविधिक सहयोगमा कोदोको सही प्रशोधन, बिस्कुट बनाउने विधि र प्याकेजिङ सम्बन्धी जानकारी प्रदान गरिएको थियो ।
शुक्रबार सम्पन्न तालिम समापन कार्यक्रममा सहभागी महिलाहरूले आफैंले तयार पारेको कोदोको बिस्कुट अतिथिहरूलाई खुवाउँदै आफ्नो सीप प्रदर्शन गरेका थिए । सहभागी यलिसा सुनुवारले गाउँमै उत्पादित कच्चा पदार्थबाट धेरै मूल्य पर्ने वस्तु उत्पादन गर्न पाउँदा आत्मविश्वास बढेको अनुभव सुनाइन् । “हामीले आफ्नै गाउँमा उत्पादन भएको कोदोबाट बिस्कुट बनाउन सिक्यौं, ” उनले भनिन्, “अब हामी आफैंले उत्पादन गरेको बिस्कुट बजारमा लैजाने आत्मविश्वाससहित अघि बढ्न सक्छौं । यो सीपले भविष्यमा आत्मनिर्भर बन्ने ढोका खोलिदिएको छ ।”
कार्यक्रममा बोल्दै गाउँपालिकाका अध्यक्ष केशव महतले सीपयुक्त मानिसहरू समाजमा सम्मानको दृष्टिले हेर्न थालिने बताए । उनले भने, “महिलाहरूले कोदोबाट बिस्कुट बनाउन सक्ने सीप आर्जन गरेका छन्, अब गाउँपालिकाले थप प्राविधिक सहयोग गरेर उनीहरूलाई पूर्ण दक्ष बनाउने छ । साथै, महिलाहरूले बनाएको बिस्कुटलाई गाउँपालिकाभित्रका विद्यालयहरूमा खपत हुने गरी योजना बनाउँदैछौं । तर, त्यसका लागि उत्पादन धेरै हुनुपर्छ ।”
गाउँपालिका उपाध्यक्ष दिपा पाख्रिनले सिकेको सीपलाई व्यवहारमा ल्याउनुपर्ने आवश्यकता औँल्याउँदै उत्पादनलाई व्यावसायिक बनाउने दिशामा गाउँपालिकाले आवश्यक सहजीकरण गर्ने प्रतिबद्धता जनाइन् । “बिक्रीमा समस्या आयो भने गाउँपालिका त्यसको पनि जिम्मेवारी लिन्छ, ” उनले स्पष्ट पारिन् ।
वडाध्यक्ष प्रदिप कुमार तामाङले प्रशिक्षित महिलाहरूलाई अब गाउँमै बसेर साना उद्योग सञ्चालनमा लाग्न सुझाव दिए । “तपाईंहरूले सिकेको सीप अब व्यवहारमा उतार्नुस्, हामी तपाईंहरूकै साथमा छौं, ” उनले भने ।
यो कार्यक्रममार्फत महिलाहरूलाई आर्थिक रूपमा सक्षम बनाउँदै गाउँमै रोजगारी सिर्जना गर्ने उद्देश्य सहित तालिम संचालन गरिएको गाउँपालिकाका प्रमुख प्रशासकीय अधिकृत रामसिं डडालले बताए ।
लिखुतमाकोशी गाउँपालिकाको महिला, बालबालिका तथा जेष्ठ नागरिक शाखाकी प्रमुख कमला कुमारी खत्रीका अनुसार विस्कुट बनाउने तालिम गाउँपालिकाभित्र महिला सशक्तिकरणको सकारात्मक अभ्यासका रूपमा स्थापित भएको छ । “आगामी दिनमा अन्य वडाहरूलाई समेत समेटेर यस्ता कार्यक्रम विस्तार गर्दै लैजाने योजना बनाएका छौं, ” खत्रीले भनिन् । तालिममा प्राविधिक सहयोग पु¥याएको मैनावती एग्रिकल्चर डेभलपमेन्ट प्रालिका अध्यक्ष युवराज सुवेदीका अनुसार महिलाहरूलाई बिस्कुट उत्पादनका लागि आवश्यक पर्ने सम्पूर्ण सामग्रीहरू पनि प्रदान गरिएको छ । “अब महिलाहरू गाउँमै साना घरेलु उद्योग सञ्चालन गर्न सक्षम भएका छन्, ” उनले बताए ।
