रामेछाप– गोकुलगंगा गाउँपालिकाका नव निर्वाचित अध्यक्ष काजी बहादुर खड्का (दिनेश) ले दुई निर्णय गर्दै कार्यभार सम्हालेका छन् । नव निर्वाचित अध्यक्ष खड्काले गर्भवती महिलालाई निःशुल्क एम्बुलेन्स सेवा र वडा नं १ देखि वडा नं ६ सम्मका जेष्ठ नागरिकलाई सम्मान गर्ने दुई निर्णय गर्दै आफ्नो कार्यभार सम्हालेका हुन् ।
बुधवार आफ्नो पाँच वर्षे कार्यकालको शुभारम्भ गरेका अध्यक्ष खड्काले गोकुलगंगा गाउँपालिका भित्रका गर्भवती महिलाहरुले आर्थिक अभावको कारण उचित स्वास्थ्य सेवा प्राप्त गर्नको लागि अस्पताल सम्म पुग्न नसकी अकालमा ज्यान गुमाउनु परेको घट्नाहरु धेरै भएकाले त्यस्ता महिलाहरुलाई सहयोग पु¥याउने उद्देश्यले पहिलो निर्णय गरेर कार्यभार सम्हालेका छन् । गाउँपालिका मातहात रहेका एम्बुलेन्स मार्फत स्वास्थ्य संस्था सम्म पु¥याउन निःशुल्क एम्बुलेन्स सेवा उपलब्ध गराइने निर्णयमा उल्लेख छ ।
त्यस्तै गाउँपालिकामा रहेका सम्पूर्ण जेष्ठ नागरिकहरु प्रेरणाका श्रोतहरु भएकाले उहाँहरुलाई राज्यले सम्मान गर्नु पर्ने कुरालाई ध्यानमा राख्दै पालिकाभरीका जेष्ठ नागरिकलाई उचित सम्मान गर्ने अर्को निर्णय पनि गरेका छन् ।
नेपाली काँग्रेसबाट निर्वाचित अध्यक्ष खड्काले जनताको भावना अनुसार काम गर्ने प्रतिवद्धता जनाउँदै गोकुलगंगाबासीको आवश्यकतालाई मुख्य केन्द्रमा राखेर फास्ट ट्रयाकबाट काम सुरु गरिने धारणा व्यक्त गरेका छन् । अध्यक्ष खड्काले पाँच वर्षको कार्यकालमा सबैको सुझाव लिएर पालिकावासीको आवश्यकतालाई पहिचान गरेर आफ्नो टिम अगाडि बढ्ने प्रतिवद्धता जनाएका छन् ।
त्यस्तै नवनिर्वाचित उपाध्यक्ष उषा देवी कार्कीले पनि आफ्नो कार्यभार सम्हालेकी छिन् । उपाध्यक्ष कार्कीले आफ्नो कार्यकालमा नागरिकको आवश्यकता अनुसार नागरिक मैत्री सेवा दिने गरी अगाडि बढ्ने प्रतिवद्धता व्यक्त गरिन् । उपाध्यक्षले आफू विधि र पद्धतीमा रहेर सबैसँग सहकार्य गरेर अगाडि बढ्ने प्रतिवद्धता जनाएकी छिन् ।
