रामेछाप- छिमेक लघुवित्त वित्तीय संस्था, रामेछाप शाखाको आयोजनामा जिल्लाका विभिन्न स्थानमा वित्तीय साक्षरता सम्बन्धी कार्यक्रम सम्पन्न भएको छ । संस्थाले आफ्नो सेवा क्षेत्रमा सक्रिय रहेका समूहका सदस्यहरूलाई लक्षित गर्दै कार्यक्रम सञ्चालन गरेको हो । शाखा प्रमुख लक्ष्मण शाहका अनुसार लिखुतामाकोशी गाउँपालिका वडा नम्बर ५, वडा नम्बर ६ तथा मन्थली नगरपालिका वडा नम्बर १४ मा गरी कुल १३२ जना सहभागी भएका छन् । जसमध्ये लिखुतामाकोशी–५ मा ४१ जना, वडा नम्बर ६ मा ४२ जना र मन्थली–१४ मा ४६ जना सहभागी गराइएको थियो ।
कार्यक्रममा समूहका सदस्यहरू, उनीहरूका अभिभावक तथा अन्य स्थानीय सहभागीको उपस्थिति रहेको थियो । सहभागीहरूलाई वित्तीय अनुशासन, बचत गर्ने तरिका, खर्च व्यवस्थापन, ऋण लिने र परिचालन गर्ने विधि लगायतका विषयमा जानकारी प्रदान गरिएको शाखा प्रमुख शाहले बताए । साथै साना व्यवसाय सञ्चालन गर्दा आम्दानी वृद्धि गर्ने उपाय, व्यवसायलाई दिगो बनाउने तरिका तथा आर्थिक योजनाबद्धता सम्बन्धी ज्ञान पनि दिइएको थियो ।
‘वित्तीय सचेतनाको अभियान, समृद्ध यात्राको पहिचान’ तथा ‘घर–घरमा वित्तीय साक्षरता’ जस्ता नारासहित संस्थाले समूह स्तरमै पुगेर यस्ता कार्यक्रम सञ्चालन गर्दै आएको जनाएको छ । ग्लोबल मनी वीक तथा वित्तीय साक्षरता अभियान अन्तर्गत यस्ता कार्यक्रमहरूलाई अझ प्रभावकारी रूपमा अघि बढाइएको संस्थाले जनाएको छ ।
छिमेक लघुवित्त वित्तीय संस्था रामेछाप शाखा २०७३ सालदेखि मन्थलीमा सञ्चालनमा रहेको छ । शाखाले हाल रामेछाप, दोलखा र सिन्धुली जिल्लाका विभिन्न पालिकामा रहेका ९५ वटा समूहमार्फत एक हजार दुई सयभन्दा बढी सदस्यहरूसँग वित्तीय सेवा प्रदान गर्दै आएको छ ।
