रामेछाप– रामेछापका ८ स्थानीय तहको आर्थिक वर्ष २०७९/०८० मा २१ करोड ६२ लाख १९ हजार रुपैयाँ रकम बेरुजू देखिएको छ । महालेखापरीक्षकको कार्यालयले प्रकाशन गरेको ६१औँ लेखापरीक्षणको प्रतिवेदनमा रामेछापका दुई नगरपालिका र ६ गाउँपालिका गरी ८ स्थानीय तहको बेरुजू रकम २१ करोड ६२ लाख १९ हजार रुपैयाँ देखिएको हो ।
महालेखापरीक्षकको ६१औँ लेखापरीक्षणको प्रतिवेदनमा रामेछापका ८ स्थानीय तहको १२ अर्ब ५३ करोड ९८ लाख ५५ हजार रुपैयाँ रकमको लेखापरीक्षण भएको थियो । प्रतिवेदन अनुसार रामेछापका ८ स्थानीय तहको जम्मा रकमको १ दशमलव ७२ प्रतिशत बेरुजू देखिएको छ ।
६१औँ वार्षिक प्रतिवेदन २०८१ अनुसार लेखापरीक्षण भएका रामेछापका ८ स्थानीय तह मध्ये खाँडादेवी गाउँपालिकाको सबै भन्दा बढी र दोेरम्बा शैलुङ्ग गाउँपालिकाको सबै भन्दा कम बेरुजू देखिएको छ । ८ स्थानीय तह मध्ये सबै भन्दा बढी बेरुजु देखिने खाँडादेवी गाउँपालिकाको बेरुजू ६ दशमलव ६७ प्रतिशत पुगेको छ भने सबै भन्दा कम बेरुजु देखिने दोरम्बा शैलुङ्ग गाउँपालिकाको ० दशमलव १५ प्रतिशत कायम भएको छ ।
रामेछापका स्थानीय तहहरूले गएको वर्ष भन्दा यो वर्ष बेरुजु अङ्क घटाउन सफल भएका छन् । सबै जसो पालिकाले आफ्नो पालिकाको बेरुजु रकम घटाउँदै लैजदाँ अघिल्लो वर्षको तुलनामा यो वर्ष ८ ओटा स्थानीय तहको बेरुजु रकम घटेको छ । अघिल्लो वर्ष ३७ करोड ७९ लाख ७ हजार रहेको थियो भने यो वर्ष उक्त रकमबाट घटेर २१ करोड ६२ लाख १९ हजार रुपैयाँ मात्रै बेरुजु देखिएको छ ।
बेरुजू बढी आउने पालिकामा खाँडादेवी पहिलो, कम आउनेमा दोरम्बा शैलुङ्ग
खाँडादेवी– अघिल्लो वर्ष (६० औँ लेखापरीक्षणको प्रतिवेदनमा) बेरुजू धेरै देखिनेमा रामेछापका ८ पालिका मध्ये खाँडादेवी गाउँपालिका पहिलो नम्बरमा थियो । ६१ औँ लेखापरीक्षण अर्थात यो वर्ष पनि जिल्लाका ८ पालिका मध्ये बेरुजु बढी आउने पालिकामा खाँडादेवी गाउँपालिका नै परेको छ । १ अर्ब ४९ करोड ७२ लाख ८ हजारको लेखापरीक्षण हुँदा ९ करोड ९७ लाख ९० हजार अर्थात ६ दशमलव ६७ प्रतिशत बेरुजु देखिएको छ । अघिल्लो वर्ष १ अर्ब ४७ करोड ८५ लाख ३ हजारको लेखापरीक्षण हुँदा ९ करोड २९ लाख १३ अर्थात ६ दशमलव २ प्रतिशत बेरुजू देखिएको थियो । खाँडादेवीको अघिल्लो वर्षको तुलनामा यस वर्ष बेरुजूको अंका घटेको छ ।
उमाकुण्ड– उमाकुण्ड गाउँपालिकाको ६१ औँ प्रतिवेदन अनुसार ५ करोड १३ लाख ४७ हजार अर्थात ३ दशमलव ७७ प्रतिशत बेरुजु आएको छ । आर्थिक वर्ष २०७९÷०८० मा उमाकुण्ड गाउँपालिकाको १ अर्ब ३६ करोड १३ लाख ४४ हजार रकमको लेखापरीक्षण भएको थियो ।
महालेखापरीक्षकको अघिल्लो वर्षको (६० औँ) प्रतिवेदनमा वर्ष १ अर्ब २५ करोड १५ लाख ६३ हजारको खेलापरीक्षण हुँदा २ करोड ४७ लाख ९१ हजार अर्थात १ दशमलव ९८ प्रतिशत बेरुजू देखिएको थियो । अघिल्लो वर्षको तुलनामा यो वर्ष उमाकुण्ड गाउँपालिकाको बेरुजु रकम वृद्धि भएको छ ।
गोकुलगंगा– गोकुलगंगा गाउँपालिकाको अघिल्लो वर्षको तुलनामा बेरुजु रकम घटेको छ । महालेखाको ६०औँ प्रतिवेदनमा गोकुलगंगा गाउँपालिकाको १ अर्ब ३५ करोड ९५ लाख ८८ हजारको लेखापरीक्षण गर्दा ५ करोड ६९ लाख ३१ हजार अर्थात ४ दशमलव १९ प्रतिशत बेरुजू देखिएको थियो । तर, यो वर्ष महालेखापरीक्षकको ६१ औँ प्रतिवेदन अनुसार १ अर्ब ३९ करोड ७५ लाख ८८ हजारको लेखापरीक्षण गर्दा १ करोड ९६ लाख ६३ हजार अर्थात १ दशमलव ४१ प्रतिशत मात्रै बेरुजु देखिएको छ ।
लिखुतामाकोशी– लिखुतामाकोशी गाउँपालिकामा अघिल्लो वर्षको जस्तै यो वर्ष पनि बेरुजू अङ्कमा केही सुधार आएर बेरुजू रकम घटेको छ । महालेखापरीक्षक ६१ औँ प्रतिवेदन अनुसार लिखुतामाकोशी गाउँपालिकाको १ अर्ब ५१ करोड ८४ लाख ९१ हजारको लेखापरीक्षण हुँदा १ करोड ७० लाख ४४ हजार अर्थात १ दशमलव १२ प्रतिशत बेरुजू देखिएको छ । अघिल्लो वर्षको प्रतिवेदनमा लिखुतामाकोशी गाउँपालिकाको ४ करोड ९३ लाख ८ हजार रुपैयाँ अर्थात ४ दशमलव ०४ प्रतिशत बेरुजू आएको आएको थियो
मन्थली– जिल्लाको सदरमुकाम समेत रहेको मन्थली नगरपालिकाको बेरुजू रकम अघिल्लो वर्षको तुलनामा यो वर्ष भने घटेको छ । महालेखाको अघिल्लो वर्षको (६०औँ) लेखापरीक्षणको प्रतिवेदन अनुसार २ अर्ब २४ करोड १३ लाख २ हजारको लेखापरीक्षण हुँदा मन्थलीको बेरुजू ५ करोड २० लाख ५८ हजार अर्थात २ दशमलव ३२ प्रतिशत बेरुजू आएको थियो । यो वर्षको प्रतिवेदन अनुसार २ अर्ब २५ करोड १३ लाख १८ हजारको लेखापरीक्षण हुँदा १ करोड ८८ लाख ४० हजार अर्थात ० दशमलव ८४ प्रतिशत मात्रै बेरुजु देखिएको छ ।
सुनापति– अघिल्लो वर्ष करोडमा रहेको सुनापति गाउँपालिकाको बेरुजू रकम यो वर्ष घटेर लाखमा आएको छ । यो वर्ष सुनापति गाउँपालिकाको बेरुजू ३४ लाख ५८ हजार अर्थात ० दशमलव २७ प्रतिशत मात्रै बेरुजु देखिएको छ । अघिल्लो वर्ष भने सुनापति गाउँपालिकाको बेरुजु रकम ४ करोड ७९ लाख ४५ हजार अर्थात ३ दशमलव ९४ प्रतिशत रहेको थियो ।
रामेछाप– रामेछाप नगरपालिकामा अघिल्लो वर्षको जस्तै यो वर्ष पनि बेरुजू अङ्कमा केही सुधार आएर बेरुजू रकम घटेको छ । महालेखापरीक्षकको कार्यालयले सार्वजनिक गरेको ६१ औँ लेखापरीक्षणको प्रतिवेदन अनुसार १ अर्ब ८८ करोड ८९ लाख ६५ हजारको लेखापरीक्षणमा ४० लाख ७७ हजार अर्थात ० दशमलव २२ प्रतिशत मात्रै बेरुजु देखिएको छ । अघिल्लो वर्ष (६०औँ प्रतिवेदन) २ अर्ब ३५ करोड २९ लाख ७ हजार रुपैयाँको लेखापरीक्षण हुँदा ७२ लाख ८३ हजार रुपैयाँ अर्थात ० दशमलव ३१ प्रतिशत बेरुजु थियो ।
दोरम्बा शैलुङ्ग– महालेखापरीक्षकको कार्यालयले सार्वजनिक गरेको ६१ औँ लेखापरीक्षणको प्रतिवेदनमा रामेछापका ८ पालिका मध्ये सबै भन्दा कम बेरुजू आउने पालिकामा दोरम्बा शैलुङ्ग गाउँपालिका पहिलो नम्बरमा परेको छ । आर्थिक वर्ष २०७९÷०८० मा दोरम्बा शैलुङ्ग गाउँपालिकामा १ अर्ब ३२ करोड ४लाख ३० हजार रुपैयाँको लेखापरीक्षण हुँदा २० खाल रुपैयाँ मात्रै बेरुजू देखिएको छ । जुन रकम लेखापरीक्षण गरेको जम्मा रकमको ० दशमलव १५ प्रतिशत हो । अघिल्लो वर्ष (६० औँ प्रतिवेदन) १ अर्ब २२ करोड ४४ लख ७५ हजारको लेखापरिक्षण गर्दा ४ करोड ६६ लख ७८ हजार अर्थात ३ दशमलव ८१ प्रतिशत बेरुजू आएको थियो ।
प्रचलित कानुन बमोजिम पु¥याउनु पर्ने रीत नपु¥याई कारोबार गरेको, राख्नु पर्ने लेखा नराखेको, बेमनासिब तरिकाले आर्थिक कारोबार गरेको रकम आदिलाई महालेखापरीक्षकको कार्यालयले बेरुजू रकमा राख्ने गर्दछ ।
विगतको अवस्था
रामेछापका ८ स्थानीय तहको बेरुजू ३७ करोड माथि, खाँडादेवीको ९ करोड बढी
रामेछापका ८ स्थानीय तहको बेरुजू ३७ करोड माथि, सबै भन्दा बढी उमाकुण्डको
रामेछापको ७ स्थानीय तहको बेरुजु १८ करोड ३७ लाख, लिखुतामाकोशीको भएन लेखापरीक्षण
रामेछाप नगरपालिका बेरुजु कम आउने स्थानीय तहमा बागमती प्रदेशकै पहिलो (सूची सहित)
