जिल्लाका विभिन्न ठाउँमा रहेका बजार मध्ये सदरमुकाम मन्थलीमा रहेको मन्थली बजार जिल्लाकै सबै भन्दा ठूलो बजार हो । सदरमुकाम भएकाले यहाँ धेरै कुराको सुविधा पाइने हुनले पनि बजार बिस्तार हुनुको साथै मानिसहरुको बसोबास पनि दिनानुदिन बढीरहेको छ । मन्थली बजारमा बनेका घरहरु पनि पक्की नै छन् । सुविधाको हिसाबले पनि यहाँ केही कमी छैन् । यस बजारमा बस्ने अधिकाशं मानिसहरु पनि जाने बुझेकै वर्ग भित्र पर्दछन् । धेरै कुराले सुविधा सम्पन्न भएको मन्थली बजारमा फोहोरको राम्रो व्यवस्थापन नहुँदा बजारको सुन्दरता नै कुरुप बन्दै गएको छ । घर भित्रबाट निस्केको फोहोर, पसलबाट निस्केको फोहोर र सवारी साधन तथा ढुवानीका साधनबाट निस्केको फोहोरलाई हामी बजार बासीले व्यवस्थापन गर्न नसक्दा बजार सरसफाइमा नगर प्रमुख, प्रमुख जिल्ला अधिकारी, सुरक्षा निकायका प्रमुखहरु, स्थानीय तहका प्रतिनिधिहरु वा विभिन्न अभियान्तहरुले गरिदिनु पर्ने स्थिति छ ।
आफ्नो घर अगाडिको फोहोर बाहिरको मानिस आएर टिपेको हेरेर बस्ने हामीले कहिल्यै पनि फोहोर उठाउन उनिहरुलाई साथ दिएनौ । बरु सफा भएको ठाउँमा घरभित्र वा पसलमा बाँकी रहेको फोहोर थुपारेर भोलीको लागि सफा गर्ने मानिसलाई बोलाई रहयौँ । त्यति मात्रै हैन, बजार सरसफाई समेत गर्न नसक्ने यहाँका जनप्रतिनिधि भन्दै सार्वजनिक ठाउँमा गएर जनप्रतिनिधिलाई गाली पनि गरीरहेका छौँ । मन्थली बजार सफा गरौँ भनेर हातमा कुचो बोकेर आउने अभियान्तहरुलाई झ्यालबाट हेरेर बस्ने संस्कारले गर्दा मन्थली बजार कहिल्यै पनि सफा हुने देखिँदैन् ।
मन्थली बजारलाई सफा राख्नको लागि जब सम्म हामीले मेरो घर अगाडि मैले नै सफा गर्नु पर्छ भन्ने सोच राख्दैनौ तब सम्म सफा मन्थली देख्न पाउँदैनौं । त्यसैले अब हामीले हाम्रो घरबाट निस्कने फोहोर र पसलबाट निस्कने फोहोरलाई व्यवस्थापन गर्ने जिम्मेवारी मेरै रहेछ भन्ने सोचको विकास गरेर नगरपालिकाको फोहोर उठाउँने गाडी आउने समय सम्मको लागि उचित व्यवस्थापन गर्न सक्यौँ भने कुरुप बन्दै गएको मन्थली बजार केही दिन बाटै सुन्दर देख्न सक्छौ । त्यसपछि हाम्रो घर अगाडि रहेको फोहोरको थुप्रो नगर प्रमुख, प्रमुख जिल्ला अधिकारी, सुरक्षा निकायका प्रमुखहरु, स्थानीय तहका प्रतिनिधि वा विभिन्न अभियान्तहरुले उठाइदिनु पर्दैन् ।
