रामेछाप- मन्थली नगरपालिकाले जेष्ठ नागरिक र महिलाहरुका लागि लक्षित गरेर गाउँ–गाउँमा लगेको निःशुल्क स्वास्थ्य शिविरबाट ९ सय ८३ जनाले सेवा पाएका छन् । सहज रुपमा स्वास्थ्य संस्थाहरुमा पुग्न नसक्ने जेष्ठ नागरिक र स्त्री रोग सम्बन्धी समस्या भएका महिलाहरुलाई लक्षित गरी गाउँमै निःशुल्क रुपमा स्वास्थ्य परिक्षाण र उपचार हुने व्यवस्था सहित संचालन गरिएको शिविरबाट ९ सय ८३ जनाले स्वास्थ्य सेवा लिएका हुन् ।
सुविधा सम्पन्न अस्पतालहरुमा आउन नसक्ने जेष्ठ नागरिकलाई लक्षित गरी ल्याव सहितको जेष्ठ नागरिक स्वास्थ्य शिविर मन्थली नगरपालिकाको वडा नं ३, ८, ११, १२ र १४ मा संचालन भएको मन्थली नगरपालिकाका स्वास्थ्य शाखा प्रमुख केशव फुयालले बताए । नगरका पाँच ओटा वडामा पाँच दिन चलेको शिविरबाट ७ सय ५८ जनाले सेवा लिएको स्वास्थ्य शाखा प्रमुख फुयालले बताए । फुयालका अनुसार ७ सय ५८ जनामा ग्यास्टिक, जोर्नी दुख्ने रोग, दम, सुगर, प्रेसर, ढाड दुख्ने जस्ता समस्या देखिएको र उनिहरुलाई निःशुल्क रुपमा औषधी उपलब्ध गराईएको छ ।
त्यस्तै मन्थली नगरपालिकाको वडा नं ६ बेतीनी र वडा नं ८ चिसापनीमा महिलाहरुका लागि लक्षित गरी राखिएको स्त्रीरोग (आङ खस्ने समस्या, पाठेघरको मुखको क्यान्सर परिक्षण) सम्बन्धी शिविरबाट २ सय २५ जना महिलाले सेवा लिएका छन् । स्त्रीरोग, आङ खस्ने समस्याको उपचार र पाठेघरको मुखको क्यान्सर परिक्षणमा सहभागी भएका महिला मध्ये करिव १० प्रतिशत महिलाहरुमा सामान्य समस्या देखिएको हुँदा उनिहरुको शिविरमै उपचार गरिएको र थप उपचार गर्नु पर्ने महिलाहरुलाई थप उपचारको लागि सम्बन्धित अस्पतालहरुमा जान अनुरोध गरिएको पनि स्वास्थ्य शाखा प्रमुख केशव फुयालले बताए ।
गाउँ–गाउँ पुर्याउने स्वास्थ्य शिविरलाई निरन्तरता दिन्छौ– नगर प्रमुख बस्नेत
मन्थली नगरपालिकाका नगर प्रमुख रमेश कुमार बस्नेतले विगतका वर्ष देखि नै संचालन गर्दै आएको गाउँ–गाउँ पुर्याउने स्वास्थ्य सेवालई निरन्तरता दिने बताएका छन् । प्रत्येक नागरिकले आधारभूत स्वास्थ्य सेवा निःशुल्क लिन पाउने मौलिक हक संविधानमै भएकाले राज्यले त्यसको जिम्मेवारी लिनु पर्छ भन्ने कुरालाई समेत आत्मासाथ गर्दै नगरपालिकाले गाउँ–गाउँ लगेको स्वास्थ्य शिविरलाई निरन्तरता दिने नगर प्रमुख बस्नेतको भनाई रहेको छ । नगर प्रमुख बस्नेतले भने– ‘हामी स्थानीय सरकार भएपछि नागरिकाका हरेक कुराको ख्याल गर्नुपर्छ । नागरिकको स्वास्थ्य सेवा जस्तो संवेदनशिल कुरामा त झन हामीले धेरै ख्याल गर्नु नै पर्छ । नगरपालिकाले १४ वटा वडामा २३ ओटा स्वास्थ्य संस्था मार्फत सेवा दिइरहेको छ । तर सबै स्वास्थ्य संस्थामा सबै रोगको विषेशज्ञ सहितको डा. नभएको हुँदा विभिन्न रोगको विषेशज्ञ डा. सहितको स्वास्थ्य शिविर गाउँमा लगेका हौँ । यस्तो शिविरबाट नजिकै रहेको स्वास्थ्य संस्थामा समेत जान नसक्ने जेष्ठ नागरिक, बालबालिका, महिला लगायतले निःशुल्क स्वास्थ्य सेवा लिएका छन् । यसरी संचालन गरिएको स्वास्थ्य शिविरबाट कम आर्थिक अवस्था भएका नागरिकलाई बढी फाइदा भएको हामीले महसुस गरेका छौँ । त्यस्तै नागरिकहरुमा पनि आफू स्वस्थ रहनको लागि संधै स्वास्थ्य परिक्षण गराउनु पर्ने रहेछ भन्ने सोचको पनि विकास हुन थालेको छ । यसले स्वस्थ नगरपालिका बनाउन पनि ठूलो सहयोग गरेको छ ।’
यो खबर आजको प्रहार खबर साप्ताहिकमा छापिएको छ ।
